Касмічны карабель «Арыён», які ляцеў да Месяца, прывадніўся ў Ціхім акіяне
Касмічны карабель НАСА новага пакалення вярнуўся на Зямлю пасля амаль 26-дзённага палёту да Месяца. Пасадачная капсула «Арыён» прываднілася ў Ціхім акіяне недалёка ад вострава Гуадалупе.
Перад уваходам у зямную атмасферу капсула аддзялілася ад службовага модуля «Арыёна». У раёне пасадкі яе чакаў дэсантны карабель ВМС ЗША «Портлэнд».
Падчас палёту «Арыён» двойчы — 21 лістапада і 5 снежня — абляцеў Месяц, набліжаючыся да яго паверхні на адлегласць каля 130 км. Акрамя таго, ён правёў шэсць дзён на далёкай арбіце вакол Месяца, калі адлегласць да яго паверхні складала каля 85 тысяч кіламетраў.
Знаходжанне карабля гэтай арбіце дазволіла ацаніць магчымасці апарата і пратэсціраваць яго сістэмы на вялікай адлегласці ад Зямлі.
Гэты палёт «Арыёна» быў выпрабавальным і таму непілатуемым. Палёты «Арыёна» з астранаўтамі на борце, як чакаецца, пачнуцца ў канцы 2024 года. У ходзе гэтай праграмы ў 2025 ці 2026 годзе плануецца зноў высадка на Месяцы.
У апошні раз чалавек пабываў на Месяцы 50 гадоў таму, гэта быў экіпаж амерыканскага «Апалона-17».
Вяртанне касмічных караблёў з такіх далёкіх экспедыцый уяўляе сабой няпростую тэхнічную задачу: яны падлятаюць да зямной атмасферы на вельмі высокай хуткасці — каля 40 000 км/г. Таму неабходны вельмі трывалы цеплаахоўны экран, каб карабель не разваліўся ў пластах атмасферы: тэмпература яго абшыўкі дасягае амаль 3000°C.
Ахоўны пласт «Арыёна» — гэта новая канструкцыя, і НАСА павінна было пераканацца ў яго эфектыўнасці, каб не рызыкаваць жыццямі астранаўтаў у будучых місіях.
Цяпер чытаюць
«Ты ў нас у Беларусі!» — «Я маму тваю я*аў». Госцю з Алтая не спадабалася заўвага за кінуты ў цэнтры Мінска недакурак35
Каментары
Зрэшты, усе нюансы вымаўлення не перадасі, і ў прынцыпе гэты востраў таксама можна было б Гвадэлупай называць. Але для разрознення хай будзе так.