Uvosień kolkaść palityčnych zatrymańniaŭ vyrasła ŭ try razy. Jość niekalki tendencyj

Daśledčyki adznačajuć, što vyrasła kolkaść zafiksavanych pravaabaroncami palityčna matyvavanych zatrymańniaŭ.

Kali letam u siarednim zatrymlivali pa 100-120 čałaviek na miesiac, to ŭvosień — u 3,5 raza bolš.

Vyrasła i kolkaść palityčna matyvavanych sudoŭ: uvosień ich było ŭ siarednim 145 u miesiac, tady jak u papiarednija miesiacy — pa 84.

Pavialičylisia terminy kryminalnych pakarańniaŭ. Kali letam siaredniemiesiačnyja sukupna prysudžanyja terminy źniavoleńnia składali prykładna 125-127 hadoŭ, to ŭ vieraśni hety pakazčyk skłaŭ 412, u kastryčniku — 426 hadoŭ. Taki rost źviazany z razhladam niekalkich hučnych spraŭ — BiełaPANa, Aŭtuchoviča, hrupy «Busły laciać», «spravy dziesiaci».

Rastuć tempy pryznańnia źniavolenych palityčnymi. Letam ich štomiesiac stanaviłasia bolš u siarednim na 87 čałaviek, vosieńniu — na 110 (a ŭ listapadzie naohuł plus 139 čałaviek).

U vosieńskich zatrymańniaŭ było niekalki asablivaściaŭ.

Pieršaje — zachavałasia tendencyja pieraśledavać svajakoŭ palitviaźniaŭ i tych, chto zmahajecca z režymam. Časam zatrymlivajuć siemjami.

Druhoje — trend na «karparatyŭnyja» zatrymańni, kali biaruć supracoŭnikaŭ adnaho pradpryjemstva, pryčym samaha roznaha profilu.

Treciaje — šyrycca tendencyja represavańnia peŭnych prafiesijnych hrup — ad śviataroŭ da dalnabojščykaŭ. Na novy ŭzrovień vyjšli represii suprać advakatury i miedyja. Advakataŭ, jakija vystupajuć na hučnych palityčnych spravach, nie tolki pazbaŭlajuć licenzii, ale časam i zavodziać na ich kryminalnyja spravy. Što da niezaležnych žurnalistaŭ, to pieraśledujuć nie tolki tych, chto piša pra palityku, ale i ź niejtralnych ŚMI, naprykład, pra sport ci ekanomiku (kiejsy «Presboła», partała Blizko.by, anłajn-vydannija «Babrujski kurjer»).

Pačali taksama zavodzić kryminalnyja spravy za intervju miedyja, jakija pryznany ekstremisckimi farmiravańniami.

Niekatorym palitviaźniam vystaŭlajuć novyja abvinavačvańni i dajuć paŭtornyja terminy.

Dakład «Biełaruski trekier pieramien» achoplivaje analiz troch miesiacaŭ — vierasień, kastryčnik, listapad. Meta — zafiksavać i daśledavać tendencyi. Pracavali nad dakładam asacyjavany analityk Jeŭrapiejskaj rady pa mižnarodnych adnosinach Pavieł Śluńkin, zasnavalnik ahienctva Sense Analytics Arciom Šrajbman, niezaležny sacyjołah Filip Bikanaŭ, prahramny dyrektar «Biełaruskaj Akademii» i staršy analityk «Centra novych idej» Hienadź Koršunaŭ, akademičny dyrektar BEROC Kaciaryna Barnukova i staršy navukovy supracoŭnik BEROC Leŭ Lvoŭski.

• 0
• 0
• 3
• 0
• 1
• 8
• 70
• 0