U Minsku abjom roźničnaha handlu letaś upaŭ na 7,6%. Heta bolš, čym u inšych rehijonach. Čamu tak adbyvajecca?
Roźničny tavaraabarot za minuły hod pamienšaŭ na 3,7% — heta siaredni pakazčyk pa krainie. U Minsku situacyja vyhladaje horš. Hetamu jość niekalki pryčyn.
Minuły raz, kali hadavy abjom roźničnaha tavaraabarotu ŭ Biełarusi skaračaŭsia, byŭ u 2016 hodzie — tady padzieńnie skłała 4,1%. Dalej, z 2017 pa 2021 hady, hety pakazčyk ros na 1,6—8,4%.
U Minsku abjom roźničnaha tavaraabarotu letaś skaraciŭsia ŭ dva razy bolš, čym u siarednim pa krainie (minus 7,6%).
«Na źnižeńnie abjomaŭ upłyvaje adrazu niekalki faktaraŭ — ad sankcyj da administracyjnaha rehulavańnia cen. Svoj śled pakinuła i źnižeńnie realnych dachodaŭ nasielnictva. Ludzi byli vymušanyja skaračać svaje pakupki», — kamientuje ekśpiert BEROC Nastaśsia Łuzhina.
Na toje, što realnyja dachody nasielnictva ŭ 2022 hodzie skaracilisia, ukazvajuć i inšyja pakazčyki. Naprykład, źmianilisia suadnosiny ŭ vydatkach nasielnictva na pramysłovyja i charčovyja tavary.
«Pa vynikach hoda pavialičyłasia dola vydatkaŭ na charčovyja tavary. Vydatki na niecharčovyja tavary ŭ košyku skaracilisia z 51,5% da 50,1%. Zvyčajna takija źmieny adbyvajucca tady, kali ŭ ludziej skaračajucca dachody», — tłumačyć ekśpiert.
Siarod inšych čyńnikaŭ, jakija ŭpłyvali na źnižeńnie abjomu tavaraabarotu ŭ cełym i ŭ Minsku ŭ pryvatnaści, ekanamist nazyvaje masavuju mihracyju.
«Značnuju dolu tych, chto źjazdžaje ź Biełarusi, składajuć płaciežazdolnyja hramadzianie. Heta tłumačyć toje, čamu mienavita Minsk maje najhoršyja pakazčyki. U stalicy była skancentravana vialikaja dola ajcišnikaŭ, jakija mieli vysokija dachody. Adtok z IT-śfiery — davoli zaŭvažny trend, bo heta mienavita taja śfiera, pracujučy ŭ jakoj, praściej za ŭsio źjechać i praciahnuć pracavać užo ŭ inšaj krainie».
Siarod inšych faktaraŭ, jakija ŭkazvajuć na toje, što Minsk adčuvaje na sabie značny adtok płaciežazdolnaha nasielnictva, možna nazvać i toje, što Minsk letaś staŭ adzinym bujnym horadam u Biełarusi, dzie źnizilisia ceny na kvatery. Na adtok biznesu i IT-siektara ŭkazvaje i rekordnaja kolkaść svabodnych ofisnych pamiaškańniaŭ u stalicy.
Što tyčycca abjomaŭ aptovaha handlu, to situacyja vyhladaje horš. Letaś aptovy tavaraabarot skaraciŭsia na 17,8% u paraŭnańni z 2021 hodam.
Čytajcie taksama:
Ahučanyja miedyjannyja zarobki za listapad
Statystyka pakazvaje, jak źbiadnieli rasijanie paśla pavarotu Rasii da impieryjalizmu. Razam ź imi i biełarusy
Ciapier čytajuć
Niazdolny pieramahčy, a kiruje. Pra kaho zahadka, dzietki?10
Kamientary