The Voice Senior — polskaje šou, u jakim piensijaniery vychodziać na scenu

Prahrama The Voice Senior — čarhovaja madyfikacyja šou «Hołas», jakoje ŭźnikła ŭ Niderłandach u 2010-m, a potym źjaviłasia ŭ šmatlikich viersijach u roznych krainach śvietu — jak jeŭrapiejskich (Hiermanija, Ispanija, Irłandyja), tak i ŭschodnich (Indaniezija, Vjetnam, Filipiny).

U Polščy taksama jość svaje viersii hetaha šou — «Hołas Polščy», «Hołas dziaciej» i, narešcie, «Hołas sieńjora». Razynka apošniaha ŭ tym, što ŭ im udzielničajuć niemaładyja śpievaki-amatary.

Adbor udzielnikaŭ pačynajecca sa «ślapoha prasłuchoŭvańnia»: treniery siadziać śpinaj da vykanaŭcaŭ, i kali niechta z trenieraŭ choča pracavać sa śpievakom, to jon pavaročvajecca da jaho — tak pretendent aŭtamatyčna pierachodzić u kamandu. Takim čynam farmirujecca 8 kamand, u kožnaj pa 6 čałaviek. U paŭfinale ŭ kožnaj hrupie zastajecca pa 3 čałavieki, a ŭ finale — pa adnym. Finalisty spaborničajuć za zvańnie «najlepšaha» hołasu Polščy, za 50 000 złotych (krychu bolš za 10 tysiač jeŭra) i za padarožža mary na 30 000 złotych.

Pieramožcu vyznačajuć telehledačy šlacham sms-hałasavańnia.

Pieršy polski vypusk The Voice Senior pahladzieła prykładna 2,97 miljona čałaviek, abo amal kožny dziasiaty darosły palak. Pieramožcami pieršaha siezona ŭ 2019 hodzie stali siostry Šydłoŭskija, jakija potym vypuścili debiutny albom. Kali žančyny padali zajaŭku na ŭdzieł, Elžbiecie, byłoj nastaŭnicy chimii, było 65 hadoŭ, Kryścinie, mastačcy, — 66, a małodšaj siastry Iałancie, niekali salistcy hrupy «Pryma Vota», — 62.

Pavialičyć

U 2021-m šou vyjhrała charyzmatyčnaja Barbara Pažečeŭska, jakaja ŭraziła žury mocaj svajho hołasu, kali vykonvała pieśniu Emi Uajnchaus Valerie. Barbara cikavicca muzykaj ź junactva, u 18 jana brała ŭdzieł u Fiestyvali savieckaj pieśni ŭ Zialonaj Hury, paźniej na praciahu mnohich hadoŭ śpiavała ŭ hurcie, vystupajučy ŭ restaranach i na tancach u Polščy, Šviecyi, Finlandyi i ZŠA.

Na ŭdzieł u «Hołasie…» jaje ŭhavaryŭ muž Irenieuš, jaki ŭ maładości taksama byŭ muzykam. Mienavita jamu jana pryśviačała kožny vystup na scenie The Voice Senior. Na žal, kachany Barbary Pažečeŭskaj pamior u listapadzie 2020 hoda padčas zdymak prahramy. U 2021-m Barbara pryśviaciła jamu pieśniu Wiem, Że Tam Jesteś.

Pavialičyć

Pieramožca «Hołasu sieńjora» — 2022 Kšyštaf Prusik žyvie ŭ varšaŭskim rajonie Bemova, dzie kožnuju niadzielu zabaŭlaje pažyłych ludziej u miascovym kłubie Karuzela. Taksama jon kiruje choram pažyłych ludziej u horadzie Novy Dvor Mazaviecki. 65-hadovy varšaviak taksama pačaŭ svaje muzyčnyja pryhody z małych hadoŭ: śpiavać navučyŭsia ŭ muzyčnaj škole. Potym, padčas supracy sa staličnaj fiłarmonijaj, staviŭ opiernyja śpiektakli pa ŭsioj Polščy, paźniej dałučyŭsia da choru Vialikaha teatra ŭ Varšavie. Praciahły čas jeździŭ pa kantraktach za miažu.

Pavialičyć

— Udzielniki — svabodnyja ludzi, a značyć, mohuć i chočuć dazvolić sabie toje, pra što maryli ŭsio žyćcio. Dla ich heta novaje žyćcio. Jany nie chočuć zornaj słavy. Jany chočuć najpierš realizavać siabie i dobra śpiavać. I padčas vystupleńniaŭ pieražyvać toje, pra što śpiavajuć, — skazała padčas prezientacyi pieršaha vypusku šou adna z členaŭ žury, vakalistka i kampazitar Uršula Dudziak.

Pa słovach jašče adnaho člena žury pieršaha siezona, polskaha vakalista Mareka Piakarčyka, dla ŭnukaŭ udzielnikaŭ heta šaniec pahladzieć, «jakija cudoŭnyja ich babuli i dziaduli, kolki jany majuć radaści i enierhii».

Na scenie hledačy mieli mahčymaść ubačyć siarod vystupoŭcaŭ šachciora na piensii, taksista z bolš jak 30-hadovym stažam i byłoha supracoŭnika łabaratoryi. Usich ich abjadnoŭvaje luboŭ da muzyki, jakaja jość ich zapałam i supravadžaje ciaham usiaho žyćcia. Adnak tolki ŭ stałym vieku jany znajšli ŭ sabie śmiełaść pastavić muzyku na pieršaje miesca.

• 9
• 0
• 0
• 1
• 0
• 0
• 2
• 0