Hałoŭny raźviedčyk Ukrainy: Viasnoj na froncie nastupić pierałomny momant
Čarhovy rasijski nastup va Ukrainie ŭžo pačaŭsia, ale jon nastolki niajakasny, što amal nieprykmietny. Pra heta skazaŭ u intervju Forbes-Ukraina kiraŭnik Hałoŭnaha ŭpraŭleńnia raźviedki Minabarony Ukrainy (HUR) Kiryła Budanaŭ.
«Jon tak idzie, što nie ŭsie heta navat bačać, — takoj jakaści hety nastup. U ich jość stratehičnaja zadača — da 31 sakavika vyjści na administracyjnyja miežy Danieckaj i Łuhanskaj abłaściej», — skazaŭ Budanaŭ.
Pa jaho słovach, Rasija, uličvajučy kolkaść nasielnictva krainy, nie adčuvaje prablem z naboram asabovaha składu. Ale bolšaść tych, chto traplaje na front, — nienavučanyja i drenna ekipiravanyja mabilizavanyja, jakija vajujuć na «Kamazach» i «Urałach».
Niekalki razoŭ u intervju kiraŭnik HUR paŭtaryŭ, što Rasija — nie Saviecki Sajuz, u jaje niama taho vajskovaha patencyjału i mahutnaściaŭ vajskova-pramysłovaha kompleksu, pra jakija zajaŭlajuć rasijskija čynoŭniki.
Za adzin rakietny abstreł Ukrainy Rasija tracić bolš rakiet, čym zdolnaja vyrabić, śćviardžaje Budanaŭ. Toje ž, pa jaho słovach, tyčycca ŭsich inšych vidaŭ uzbrajeńniaŭ i bojeprypasaŭ.
Na dumku kiraŭnika ŭkrainskaj raźviedki, u druhoj pałovie viasny adbuducca vyrašalnyja bai i na froncie nastupić pierałomny momant.
Jon ustrymaŭsia ad kankretnych prahnozaŭ, ale skazaŭ, što pieramozie Ukrainy spryjajuć dva asnoŭnyja momanty: jana viadzie baraćbu na svaim poli i na jaje baku ŭvieś cyvilizavany śviet.
Ciapier čytajuć
Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro7
Kamientary