2 sakavika ŭ Branskuju vobłaść RF pranikła hrupa dyviersantaŭ. Adkaznaść za heta ŭziaŭ na siabie «Ruski dobraachvotnicki korpus». Žurnalisty RBK pahladzieli, što tam adbyvajecca ciapier.
Usie padjezdy da siołaŭ Lubiačany i Sušany i inšych pryhraničnych terytoryj zabłakavanyja. Pieršy błokpost — na pavarocie ŭ siale Sačkovičy, tut pravierkaj transpartu — tak zvanymi filtracyjnymi mierapryjemstvami — zajmajucca supracoŭniki palicyi i DIBDR. Tut praviarajuć tolki mašyny, jakija vyjazdžajuć u bok Branska.
Druhi błokpost raźmieščany dalej pa darozie ŭ bok ukrainskaj miažy, praz 12 km. Tam užo — ludzi ŭ vajskovaj formie i ŭ poŭnaj bajavoj vykładcy z aŭtamatami. Dla ŭjezdu ŭ pryhraničnuju zonu nieabchodna atrymać śpiecyjalnyja propuski ŭ vajenkamacie najbližejšaha rajcentra — pasiołka Klimava. Jak raspavioŭ RBK adzin z žycharoŭ Klimaŭskaha rajona, propuski dla znachodžańnia ŭ pamiežnaj zonie afarmlajuć i ŭ zvyčajny čas. Ludziam, jakija nie pražyvajuć na pryhraničnych terytoryjach, treba zakazvać ich za 15 dzion.
Abjazny šlach praź siało Sałaŭjoŭka taksama pierakryty, tam na darozie dziažurać supracoŭniki FSB. Dźvie miascovyja žycharki raspaviali RBK sa słoŭ svaich znajomych, jakija pražyvajuć u Lubiačanach i Sušanach, što im ciapier zabaronieny vyjezd ź siołaŭ.
Ciapier tam pracuje Śledčy kamitet, udakładnili jany. Akramia taho, u miascovych niama suviazi — pavodle RBK, dyviersanty, jakija napali na viosku, adabrali ŭ ich mabilnyja telefony.
Učora Uładzimir Pucin nazvaŭ napad na prymiežny rajon Branskaj vobłaści teraktam. Śledčy kamitet paviedamiŭ, što pa fakcie napadu dyviersantaŭ raspačataja kryminalnaja sprava pa artykułach ab terakcie, zamachu na žyćcio supracoŭnikaŭ pravaachoŭnych orhanaŭ i źniščeńni majomaści.
Chto paciarpieŭ padčas napadu i bajoŭ z dyviersantami
Pavodle aficyjnaj infarmacyi z rasijskaha boku, u sutyknieńni z dyviersantami askiepkavyja ranieńni atrymali padpałkoŭnik i praparščyk pahranupraŭleńnia FSB Rasii pa Branskaj vobłaści.
Uviečary 2 sakavika hubiernatar Bahamaz paviedamiŭ, što ŭ vyniku dziejańniaŭ dyviersantaŭ zahinuŭ jašče adzin čałaviek — mužčyna 1966 hoda naradžeńnia, vadziciel VAZ-2107.
Akramia taho, ahniastrelnaje ranieńnie atrymaŭ 36-hadovy žychar Sušan Aleh Žukaŭ.
Taksama ŭviečary 2 sakavika słužbovy aŭtamabil Rashvardyi Fiat padarvaŭsia na minie. Paciarpieli čaćviora supracoŭnikaŭ Rashvardyi. Askiepkavyja ranieńni atrymali padpałkoŭnik, dva kapitany i siaržant palicyi.
Zahinuŭ 64-hadovy žychar pasiołka Klimava Leanid Hałavanaŭ, vadziciel aŭtamabila Šeŭrale-Niva, jakuju abstralali dyviersanty. Jon vioz troch dziaciej ź siołaŭ u škołu, u vyniku napadu ranieńnie atrymaŭ adzin ź ich — dziesiacihadovy Fiodar. Akramia jaho, u mašynie znachodzilisia dźvie dziaŭčynki, jany nie paciarpieli. Ministr aśviety Siarhiej Kraŭcoŭ kazaŭ, što dziesiacihadovy paranieny chłopčyk vyvieŭ z mašyny, jakaja trapiła pad abstreł, dvuch inšych dziaciej, jany schavalisia ŭ lesie, a potym zmahli dabracca na spadarožnaj mašynie da balnicy.
Jak raskazała telekanału «Źviazda» maci Fiodara, paśla stralby dzieci pabiehli pa poli, zatym vybralisia na darohu, spynili mašynu i dabralisia da adnoj ź viosak. Adtul chłopčyka pieravieźli ŭ Klimaŭskuju centralnuju rajonnuju balnicu. Potym u Bransk.
Chto ŭziaŭ na siabie adkaznaść za ataku
Praź niekalki hadzin paśla napadu ŭ siecivie raspaŭsiudziłasia videa, na jakim niekalki ŭzbrojenych mužčyn stajać la fielčarska-akušerskaha punkta Lubiečan sa ściaham. Jany śćviardžali, što pradstaŭlajuć «Ruski dobraachvotnicki korpus».
Daradca ofisa prezidenta Ukrainy Michaił Padalak nazyvaŭ paviedamleńni ab napadzie ŭkrainskich dyviersantaŭ «kłasičnaj pravakacyjaj».
Kamientary