Rasija ŭchilajecca ad sankcyj usio chitrejšymi sposabami

24 lutaha ZŠA adznačyli hadavinu ŭvarvańnia rasijskich zachopnikaŭ va Ukrainu zamarozkaj aktyvaŭ jašče dziasiatka rasijskich bankaŭ. Hetak ža Vialikabrytanija i ES pašyryli svaje čornyja śpisy. Metaj čarhovaha ŭzmacnieńnia sankcyj źjaŭlajecca likvidacyja ščylin, praź jakija pucinski režym moža abychodzić zabarony. Jak vynikaje z sumiesnaha daśledavańnia The Economist i SourceMaterial, uchileńnie Rasii ad sankcyj stanovicca ŭsio bolš prasunutym, asabliva kali sprava tyčycca nafty, dachody ad prodažu jakoj finansujuć rasijskuju ahresiju i vajnu.

Miesiac tamu Jeŭropa ŭviała zabaronu na impart pierapracavanaj (ačyščanaj) rasijskaj nafty, raniej zabaraniŭšy taksama pakupku syroj (nieačyščanaj) nafty. Pry hetym ES nie zabaraniaje svaim hruzaadpraŭščykam, strachoŭščykam i bankam praciahvać spryjać rasijskamu ekspartu ŭ inšyja krainy, pakul nafta pradajecca nižej za canu, ustanoŭlenuju hrupaj krain G7. 

U hety ž čas bolšaść krain «pa-za Zachadam» nie ŭviali ŭłasnyja sankcyi, što dazvoliła ŭźniknuć kupie ćmianych pasrednikaŭ, niedastupnych zachodnim mieram uździejańnia. U daśledavańni razhladajecca prykład kankretnaj firmy Bellatrix — nikomu raniej nieviadomaha handlara — jakaja raptam vyjaviłasia ŭłaśnicaj siami tankieraŭ. Ułaśnikam kampanii, zarehistravanaj u Hankonhu, źjaŭlajecca niechta Biłał Alijeŭ, hramadzianin Azierbajdžana, prava ŭłasnaści jakomu było pieradadzienaje praź niekalki tydniaŭ paśla pačatku vajny. Pieravažnuju bolšaść naftapraduktaŭ kampanija zakuplaje nie ŭ aby-kaho, a ŭ rasijskaha dziaržaŭnaha hihanta «Rasnafty».

Ale ž samaje cikavaje — heta adkul tak zvany Bellatrix atrymlivaje hrošy na zakupku rasijskich naftapraduktaŭ. Jak pakazvajuć dakumienty, kampanija atrymała pazyku ŭ 350 miljonaŭ dalaraŭ ad rasijskaha ž dziaržaŭnaha kredytora — Raśsielhasbanka.

Asabliva kryvadušna na hetym fonie hučać słovy rasijskaj vice-premjerki ​​Viktoryi Abramčanki, jakaja ŭ kancy śniežnia minułaha hoda zajaŭlała, što sa zhadanaha banka treba źniać sankcyi dla palahčeńnia pastavak praduktaŭ charčavańnia i «harantavała», što «praz hety bank buduć iści tolki pradukty charčavańnia, tolki minieralnyja ŭhnajeńni».

Zatym pa łancužku rasijskija naftapradukty iduć dalej: naprykład, Bellatrix, imavierna, maje ciesnyja dziełavyja adnosiny z Coral Energy — trejdaram, jaki bazujecca ŭ Dubai i naležyć inšamu azierbajdžanskamu biznesmienu.

Aproč hetaha, častka rasijskaj syroj nafty paśla pierapracoŭki navat znachodzić šlach nazad u Jeŭropu, pakul zachodnija enierhietyčnyja kampanii i trejdary (kštałtu Shell i Vitol) pastaŭlajuć jaje ŭ ES, časta z Turcyi. Na heta ŭ kampanijach kažuć, što taki handal nie źjaŭlajucca niezakonnym — i heta praŭda. Etyčny bok takoha biznesu, naturalna, mała cikavić handlaroŭ, pakul popyt na rasijskaje paliva zastajecca vializnym.

Dyk ci moža Zachad zrabić jašče bolš, kab spynić patok šerych finansaŭ u Rasiju? I ci zachoča jon heta rabić? Pytańnie dahetul adkrytaje.

• 6
• 0
• 6
• 5
• 0
• 2
• 47
• 0