Roliki z konkursu «Mis Kryčaŭcemientnašyfier» zajšli ŭ tyktoku — bolš za paŭmiljona prahladaŭ
3 sakavika ŭ kryčaŭskim DK «Cemientnik» vybrali samuju cudoŭnuju dziaŭčynu AAT «Kryčaŭcemientnašyfier». Mima hetaj padziei nie prajšła ŭ svoj čas i «Naša Niva», ale akazałasia, što konkurs sa składanaj nazvaj nie pakinuŭ abyjakavymi i karystalnikaŭ sacsietak, piša «Kamsamolskaja praŭda».
Karystalnica tyktoka @fox_look_krychaw apublikavała ŭ sacsietcy niekalki rolikaŭ z zavodskaha konkursu pryhažości. Samym papularnym staŭ karotki rolik z defile ŭdzielnic. Heta videa litaralna ŭzarvała tyktok — amal 600 tysiač prahladaŭ, bolš za 5000 łajkaŭ i jašče kala 1000 kamientaryjaŭ.
Jašče da padviadzieńnia vynikaŭ karystalniki sacsietki sami vyznačyli, kamu b ź dziaŭčat jany addali karonu karalevy pryhažości. Bolš za ŭsio stanoŭčych acenak ad internet-karystalnikaŭ atrymała adna z udzielnic: «Pieršaja jak karaleva! Vyjšła pad fanfary i samaacenka ŭ jaje vyšejšaja, čym u astatnich».
Praŭda, dziaŭčyna pad numaram 1, jakuju ŭ asnoŭnym adznačali kamientatary, pieramohu nie atrymała. Zatoje Aksanie Biełavusavaj dastaŭsia tytuł «Mis hladackich simpatyj», a taksama pieramoha ŭ naminacyi «Mis čaroŭnaść». A «Mis Kryčaŭcemientnašyfier-2023» stała ŭdzielnica pad numaram 3, Łarysa Padlahajeva. Dziaŭčyna pracuje inžynieram-budaŭnikom adździeła kapitalnaha budaŭnictva AAT «Kryčaŭcemientnašyfier».
Paviedamlajecca, što konkurs pryhažości na Kryčaŭskim pradpryjemstvie apošni raz pravodzili bolš za 15 hadoŭ tamu. U 2023-m jaho było vyrašana adnavić, zaprasiŭšy dla ŭdziełu dziaŭčat i ź filijałaŭ zavoda. U im udzielničali dzieviać pryhažuń.
Ciapier čytajuć
Zahinuŭ biełaruski dobraachvotnik Alaksiej Łazaraŭ6
Kamientary