Što viadoma pra dziaŭčynu, jakaja padaryła załatuju statuetku prapahandystu Tatarskamu
Padčas tvorčaha viečara ŭ Piciery vajennamu prapahandystu Uładlenu Tatarskamu ŭručyli jahony załaty biust u kascy. Vierahodna, u im i była zakładziena vybuchoŭka. Padarunak zrabiła dziaŭčyna — voś što pra jaje paviedamlajuć.
Jak miarkujecca, dziaŭčynu, jakaja ŭručyła statuetku, zavuć Maryja Ja., jana ź Ivana-Frankoŭska, paviedamlaje kanał «Rańšie vsiech. Nu počti». Nazvałasia jana Nastaśsiaj.
Pavodle infarmacyi Baza, na datyčnaść da vybuchu praviarajuć i inšuju dziaŭčynu. Jaje kličuć Darja T. U lutym 2022 jaje dvojčy zatrymlivali padčas antyvajennych mitynhaŭ u Sankt-Pieciarburhu.
Dziaŭčyna, jak piša 112, znachodzicca ŭ adnoj z balnic Sankt-Pieciarburha. Jaje stan lekary aceńvajuć jak siaredniaj stupieni ciažkaści. Jana znachodzicca ŭ šokavaj pałacie, dakumientaŭ pry joj nie znajšli.
Jak pisała «Fantanka», paśla ŭručeńnia padarunka dziaŭčyna zaniała svajo miesca ŭ zale. Praź piać chvilin prahrymieŭ vybuch.
«Adna za stolikam siadzieła niejkaja Naścia, kaža: ja mastačka, chacieła rabić hieroiku SVA, ale heta niaprosta. Tamu ja zrabiła vaš biust pakul tolki. Jon u harderobie. Idzie tudy, biare vialikuju skrynku, addaje jamu, tam niešta pazałočanaje. Jon žartuje: maŭlaŭ, spadziajusia, vy nie zrabili mianie toŭstym. Kaža «dziakuj», stavić pobač», — pryvodzilisia słovy vidavočcy.
Inšyja resursy, sa spasyłkaj na vidavočcaŭ, pisali, što jana paśpieła syści z kaviarni.
Pakul ahučvajucca roznyja viersii. Pa adnoj ź ich, dziaŭčyna mahła i nie viedać, što ŭ hipsavaj statuetcy zakładziena vybuchoŭka, a sama pryłada była pryviedziena ŭ dziejańnie dystancyjna.
Paźniej «Interfaks» sa spasyłkaj na svaju krynicu paviedamiła, što zatrymanaja Darja T., 1997 hoda naradžeńnia.
Usiaho na tvorčaj sustrečy było pad sotniu čałaviek. U vyniku vybuchu, pa źviestkach rasijskaha Minzdaroŭja, 24 trapili ŭ balnicy, 6 ź ich u ciažkim stanie. Siarod paciarpiełych — kaardynatar ruchu «Bieśśmiarotny połk» u Talinie Siarhiej Čavulin, jakoha departavali z Estonii ŭ lutym.
Ciapier čytajuć
«Ni tady, ni siońnia ja nie liču, što zrabiŭ štości kiepskaje». Dziadok ščyra raskazaŭ pra byłyja adnosiny z 16‑hadovaj dziaŭčynaj2
Kamientary