Vyjšła kniha dla dziaciej «Kazki staroha lecišča» Maryi Vajciašonak
U vydaviectvie «Dyhraf» vyjšła kniha Maryi Vajciašonak «Kazki staroha lecišča» dla maleńkich čytačoŭ i ich baćkoŭ.
Piśmieńnica stvaryła nie prosta kazačnyja siužety, a ceły fiłasofski śviet, pabudavany na hłybokaj pavazie da ŭsiaho žyvoha, piša bellit.info.
Hetyja kazki naradzilisia tam, dzie čas ciače pavodle zakonaŭ pryrody: na starym leciščy ŭ Isłačy i na novym — u Siličach. Piersanažy Maryi Vajciašonak — viaskovyja, lasnyja i sadovyja žychary, jakija lubiać, marać, šukajuć svaju dolu i vyrašajuć viečnyja prablemy dabra i zła. Hetaja kniha — sustreča ź Biełaruśsiu čaroŭnaj, dzie kožnaja istota maje historyju i maje svaju dušu.
Vy kali-niebudź zadumvalisia, pra što razmaŭlajuć staryja rečy ŭ dačnych chatkach, kali haspadary źjazdžajuć u horad? Jakija sakrety tojać u sabie kvietki ŭ sadzie i viecier, što zabłytaŭsia ŭ kronach dreŭ? Hetaja kniha — jak cichaja razmova z samim saboj. Jana pra toje, jak važna zaŭvažać mahiju ŭ zvyčajnym tumanie ci ŭ rypieńni dźviarej.
Nad afarmleńniem knihi pracavała mastačka Śviatłana Ryžykava.
«Kazki staroha lecišča» Maryi Vajciašonak možna nabyć u «Knižnaj šafie», «Akademičnaj knizie», a taksama zamović praz Wildberries.
Vodhuk na knihu možna pačytać na sajcie z navinkami biełaruskaj litaratury.
Kamientary