Žuraviny daŭno viadomyja ŭ jakaści narodnaha srodku dla prafiłaktyki i lačeńnia infiekcyj močapałavych šlachoŭ. Ciapier navukoŭcy heta paćvierdzili, ale z peŭnymi ŭdakładnieńniami.
Novaje daśledavańnie znajšło dastatkova dokazaŭ, jakija paćviardžajuć upłyŭ vykarystańnia praduktaŭ na asnovie žuravin na prafiłaktyku IMP u žančyn z paŭtornymi infiekcyjami, dziaciej i ludziej z pavyšanaj ryzykaj IMP (naprykład, pacyjentaŭ, jakija prachodzili pramianiovuju terapiju z nahody takich zachvorvańniaŭ, jak rak mačavoha puzyra). U toj ža čas nie było znojdziena padobnych važkich dokazaŭ efiektu žuravin dla pažyłych ludziej i ciažarnych.
Žuraviny daŭno viadomyja ŭ jakaści narodnaha srodku dla prafiłaktyki i lačeńnia IMP. Jahady bahatyja na złučeńni, jakija majuć nazvu praantacyjanidy i mohuć pryhniatać rost bakteryj, časta adkaznych za IMP, asabliva kišačnaj pałački. Ale dokazy karyści žuravin dahetul byli nieadnaznačnymi, bo stanoŭčyja daśledavańni časta finansavalisia kampanijami, jakija pradajuć pradukty z žuravin.
Cochrane Library, jakaja pravodziła daśledavańnie — heta brytanskaja daśledčaja arhanizacyja, jakaja karystajecca pavahaj za ŭsiebakovyja ahlady danych kliničnych vyprabavańniaŭ, źviazanych z važnymi temami achovy zdaroŭja. Arhanizacyja pieryjadyčna vyvučała, ci mohuć žuraviny praduchilić IMP. U apošnim analizie na hetuju temu daśledčyki vyvučyli 50 daśledavańniaŭ z udziełam amal 9000 udzielnikaŭ.
Adnak novy ahlad nie źjaŭlajecca poŭnym pośpiecham dla hetaj viersii, adznačaje Gizmodo. Aŭtary nie znajšli dastatkova dakładnych dokazaŭ, jakija paćviardžali b karyść vykarystańnia jahad dla prafiłaktyki IMP u troch peŭnych hrupach: pažyłych ludziej, ciažarnych žančyn i ludziej ź niervova-myšačnaj dysfunkcyjaj mačavoha puzyra i/abo jaho niapoŭnym aparažnieńniem. Taksama nie było dastatkova danych, kab vyznačyć, lepš ci horš upłyvajuć žuraviny na prafiłaktyku IMP, čym antybijotyki abo prabijotyki.
Niahledziačy na heta, vysnovy mohuć źmianić mierkavańnie mnohich ludziej, jakija skieptyčna staviacca da hajučych sił žuravin. Prynamsi, zdajecca, niama asablivaj škody ad taho, kab pasprabavać ich užyvać, kali vy naležycie da hrupy pavyšanaj ryzyki raźvićcia IMP. Pa słovach aŭtaraŭ, samym raspaŭsiudžanym pabočnym efiektam, pra jaki paviedamlałasia ŭ hetych vyprabavańniach, byŭ bol u žyvacie.
U kancentratach žuravinavaha soku časta šmat cukru, tamu pić šmat soku nie rekamiendujecca. Zrešty, soki abo žuravinavyja tabletki ź nizkim utrymańniem cukru dapamohuć paźbiehnuć hetaj prablemy. Ź inšaha boku, aŭtary taksama kažuć, što nieabchodnyja dadatkovyja daśledavańni, kab vyśvietlić aptymalnuju dozu dla prafiłaktyki IMP i paćvierdzić, chto atrymaje najbolšuju karyść ad jaje pryjomu.
Kamientary