10 maja Ekanamičny sud Viciebskaj vobłaści raspačaŭ vytvorčaść pa spravie ab bankructvie adkrytaha akcyjaniernaha tavarystva «Loźnienski lnozavod», amal usie akcyi jakoha naležać dziaržavie, pišuć «Narodnyja naviny Viciebska».
Jak vynikaje z materyjałaŭ spravy, užo z 2018 hoda lnozavod maje niaŭstojlivaje ekanamičnaje stanovišča. Ciapier kredytorskaja zapazyčanaść pradpryjemstva składaje 4 376 169 rubloŭ 30 kapiejek, ź jakich 953 947 rubloŭ 2 kapiejki — abaviazkovyja płaciažy.
Na lnozavodzie pracuje 55 čałaviek, jon zajmajecca pierapracoŭkaj ilnotrasty, u tym liku i dla dziaržaŭnaha pradpryjemstva «Lozna-lon», jakoje nie maje svaich vytvorčych mahutnaściaŭ. Raniej ilnozavod taksama sam vyroščvaŭ lon, adnak viasnoj 2022 hoda jaho pierastali siejać.
Sud pryznačyŭ na pradpryjemstva časovaha kiraŭnika i vyznačyŭ achoŭny pieryjad terminam da 10 lipienia.
Loźnienski lnozavod zasnavany bolš za 90 hadoŭ tamu, 5 śniežnia 1930 hoda. Ciapier AAT «Loźnienski lnozavod» strukturna ŭvachodzić u abjadnańnie «Viciebskabllon».
Kaliści vielmi raźvitaje ŭ Biełarusi lnavodstva ŭžo šmat hadoŭ znachodzicca ŭ kryzisie, Łukašenka jašče ŭ 2019 hodzie zahadvaŭ aptymizavać kolkaść ilnozavodaŭ u Viciebskaj vobłaści šlacham ich skaračeńnia. I hety praces idzie da hetaha času. A rašeńni ab madernizacyi haliny prymalisia jašče raniej.
U kastryčniku 2021 hoda, darečy, na Loźnienskim ilnozavodzie adbyŭsia bujny pažar, jaki siarod inšaha staŭ admietny i tym, što padčas jaho tušeńnia pamior namieśnik načalnika Viciebskaha abłasnoha ŭpraŭleńnia MNS Andrej Mazol. U jaho nie vytrymała serca.
Ciapier čytajuć
«Jana hadami ciarpieła, a paśla adzin raz udaryła muža nažom — hetaha chapiła, kab zabić»1
Kamientary
🤷🏻♂️