U Novaj Ziełandyi žurnalist dziaržaŭnaha radyjo publikavaŭ prarasijskija materyjały

Ahułam «redakturu» zaznała bolš za dziasiatak artykułaŭ, jakija radyjostancyja pieradrukavała z takich nadziejnych krynic, jak Reuters i Bi-bi-si.

Artykuły byli padkarektavanyja supracoŭnikam, jaki pryznaŭsia, što zajmajecca hetym užo šmat hadoŭ. Da prykładu, jon dabaŭlaŭ śćviardžeńni ab tym, što rasijskim miežam pahražali nieanacysty, i što Krym byŭ anieksavany Rasijaj paśla praviadzieńnia tam refierendumu, piša Bi-bi-si.

Pa słovach Tomsana, heta byŭ vielmi balučy i šakavalny incydent. Žurnalista, adkaznaha za publikacyju, časova adchilili ad pracy.

«Ja vielmi zasmučany tym, što ŭ našych artykułach akazałasia prakramloŭskaje śmiećcie, hetamu niama apraŭdańnia, — skazaŭ Tomsan, asobna vybačyŭšysia pry hetym pierad svajoj ukrainskaj aŭdytoryjaj. — Hety incydent taksama padymaje važnaje pytańnie ab redahavańni našych navin u režymie anłajn. Vidavočna, što naša sistema redahavańnia nie takaja nadziejnaja, jak pavinna być».

Tomsan taksama adznačyŭ, što ciapier supracoŭniki radyjostancyi ŭvažliva prahladajuć tysiačy raniej apublikavanych artykułaŭ u pošukach padazronych źmianieńniaŭ, ale hetaja praca moža zaniać mnohija dni, kali nie tydni.

Miž tym, jak śćviardžaje novaziełandskaja płatforma navin 1News, ukrainskaja abščyna Novaj Ziełandyi jašče ŭ kastryčniku minułaha hoda skardziłasia, što artykuły RNZ vielmi nahadvajuć prarasijskuju prapahandu.

U pryvatnaści, havorka išła ab adnym artykule aŭtarstva samoj radyjostancyi, u jakoj utrymlivałasia ničym nie padmacavanaje śćviardžeńnie, što Novaja Ziełandyja, «sama taho nie ŭśviedamlajučy, dapamahaje ŭzbrojvać nieanacysckich bajevikoŭ i vielmi pravyja hrupoŭki».

Choć list sa skarhaj byŭ napisany jašče vosiem miesiacaŭ tamu, artykuł da minułaha tydnia byŭ dastupny na sajcie radyjostancyi. U minułuju niadzielu jon źjaviŭsia znoŭ z prypiskaj, što ŭ pieršapačatkovaj viersii nie byŭ vykanany bałans mierkavańniaŭ, ale ciapier tudy dadadzieny kamientary z bolš šyrokaha koła krynic i artykuł całkam adpaviadaje redakcyjnym standartam RNZ.

Na pytańnie 1News, ci byŭ hety artykuł napisany tym ža žurnalistam, jaki papraviŭ dziasiatki inšych tekstaŭ i ŭ dačynieńni da jakoha pravodzicca rasśledavańnie, RNZ pakul nie adkazała.

Akramia taho, u RNZ majucca damovy ab šerynhu kantentu ź inšymi internet-vydańniami, u pryvatnaści, artykuł aŭtarstva RNZ, jaki źmiaščaŭ hałasłoŭnyja śćviardžeńni, byŭ u minułym hodzie pieraapublikavany vydańniami New Zealand Herald i Newshub.

Adnak u bolšaści vypadkaŭ internet-vydańni, jakija zaklučyli damovu ab šerynhu z RNZ, nie majuć prava publikavać artykuły trecich bakoŭ, raźmieščanyja na sajcie radyjostancyi, tamu ryzyka traplańnia da ich adredahavanych materyjałaŭ minimalnaja.

• 1
• 0
• 0
• 3
• 2
• 0
• 8
• 0