У Новай Зеландыі журналіст дзяржаўнага радыё публікаваў прарасійскія матэрыялы
Кіраўнік новазеландскай дзяржаўнай радыёстанцыі RNZ Пол Томсан прынёс прабачэнні за публікацыю, як ён выказаўся, «пракрамлёўскага смецця» пасля таго, як у некалькі артыкулаў пра Украіну, размешчаных на сайце радыёстанцыі, былі ўнесены неаўтарызаваныя змены, якія выстаўлялі ў выгадным святле Расію.
Агулам «рэдактуру» зазнала больш за дзясятак артыкулаў, якія радыёстанцыя перадрукавала з такіх надзейных крыніц, як Reuters і Бі-бі-сі.
Артыкулы былі падкарэктаваныя супрацоўнікам, які прызнаўся, што займаецца гэтым ужо шмат гадоў. Да прыкладу, ён дабаўляў сцвярджэнні аб тым, што расійскім межам пагражалі неанацысты, і што Крым быў анексаваны Расіяй пасля правядзення там рэферэндуму, піша Бі-бі-сі.
Па словах Томсана, гэта быў вельмі балючы і шакавальны інцыдэнт. Журналіста, адказнага за публікацыю, часова адхілілі ад працы.
«Я вельмі засмучаны тым, што ў нашых артыкулах аказалася пракрамлёўскае смецце, гэтаму няма апраўдання, — сказаў Томсан, асобна выбачыўшыся пры гэтым перад сваёй украінскай аўдыторыяй. — Гэты інцыдэнт таксама падымае важнае пытанне аб рэдагаванні нашых навін у рэжыме анлайн. Відавочна, што наша сістэма рэдагавання не такая надзейная, як павінна быць».
Томсан таксама адзначыў, што цяпер супрацоўнікі радыёстанцыі ўважліва праглядаюць тысячы раней апублікаваных артыкулаў у пошуках падазроных змяненняў, але гэтая праца можа заняць многія дні, калі не тыдні.
Між тым, як сцвярджае новазеландская платформа навін 1News, украінская абшчына Новай Зеландыі яшчэ ў кастрычніку мінулага года скардзілася, што артыкулы RNZ вельмі нагадваюць прарасійскую прапаганду.
У прыватнасці, гаворка ішла аб адным артыкуле аўтарства самой радыёстанцыі, у якой утрымлівалася нічым не падмацаванае сцвярджэнне, што Новая Зеландыя, «сама таго не ўсведамляючы, дапамагае ўзбройваць неанацысцкіх баевікоў і вельмі правыя групоўкі».
Хоць ліст са скаргай быў напісаны яшчэ восем месяцаў таму, артыкул да мінулага тыдня быў даступны на сайце радыёстанцыі. У мінулую нядзелю ён з'явіўся зноў з прыпіскай, што ў першапачатковай версіі не быў выкананы баланс меркаванняў, але цяпер туды дададзены каментары з больш шырокага кола крыніц і артыкул цалкам адпавядае рэдакцыйным стандартам RNZ.
На пытанне 1News, ці быў гэты артыкул напісаны тым жа журналістам, які паправіў дзясяткі іншых тэкстаў і ў дачыненні да якога праводзіцца расследаванне, RNZ пакуль не адказала.
Акрамя таго, у RNZ маюцца дамовы аб шэрынгу кантэнту з іншымі інтэрнэт-выданнямі, у прыватнасці, артыкул аўтарства RNZ, які змяшчаў галаслоўныя сцвярджэнні, быў у мінулым годзе пераапублікаваны выданнямі New Zealand Herald і Newshub.
Аднак у большасці выпадкаў інтэрнэт-выданні, якія заключылі дамову аб шэрынгу з RNZ, не маюць права публікаваць артыкулы трэціх бакоў, размешчаныя на сайце радыёстанцыі, таму рызыка трапляння да іх адрэдагаваных матэрыялаў мінімальная.
23‑гадовага афіцэра брыгады спецназа асудзілі на 19 гадоў за «здраду дзяржаве»17
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары