Psichičnyja razłady ŭ baćkoŭ mohuć pavialičyć ryzyku zaŭčasnych rodaŭ — novaje daśledavańnie

U novym daśledavańni, apublikavanym u časopisie PLOS Medicine, navukoŭcy vyjavili, što psichičnaje zachvorvańnie baćki pavialičvaje ryzyku zaŭčasnych rodaŭ i što ryzyka jašče bolšaja, kali zachvorvańnie majuć aboje baćki.

Da zaŭčasnych adnosiać rody, što adbyvajucca da 37 tydnia ciažarnaści. (The Conversation zaŭvažaje, što ŭsio bolš faktaŭ śviedčyć ab tym, što ryzyki niespryjalnych nastupstvaŭ dla zdaroŭja pavyšanyja nie tolki dla tych niemaŭlataŭ, jakija naradzilisia niedanošanymi, ale i dla tych, što naradzilisia ŭ «rańni termin»: na 37-38-ym tydni ciažarnaści.)

Niemaŭlaty, jakija naradzilisia niedanošanymi, majuć bolšy ŭzrovień parušeńniaŭ niervovaha raźvićcia, takich jak, naprykład, razłady aŭtystyčnaha śpiektru. Tamu čym raniej naradžajecca dzicia, tym vyšejšaja ryzyka raźvićcia tych ci inšych uskładnieńniaŭ.

U novym daśledavańni byli praanalizavanyja danyja pra 1,5 miljona niemaŭlataŭ, jakija naradzilisia ŭ Šviecyi ŭ pieryjad z 1997 da 2016 hoda. Infarmacyju ab psichičnym zdaroŭi baćkoŭ daśledčyki atrymali z Nacyjanalnaha rejestra pacyjentaŭ, u jakim zapisvajucca ŭsie psichijatryčnyja dyjahnazy, pastaŭlenyja šviedskimi kliničnymi śpiecyjalistami. Prykładna ŭ 15% niemaŭlat chacia b adzin z baćkoŭ mieŭ psichičny razład.

Vyjaviłasia, što niemaŭlaty, čyj baćka mieŭ psichičnaje zachvorvańnie, mieli na 12% bolšuju ryzyku naradzicca niedanošanymi (u paraŭnańni ź dziećmi, u jakich nivodzin z baćkoŭ nie mieŭ psichičnych razładaŭ). Ryzyka pavialičvałasia na 31%, kali psichičnaje zachvorvańnie mieła tolki maci. Kali ž chvareli abodva baćki, ryzyka pavialičvałasia na 52%.

Z usich razhledžanych daśledčykami zachvorvańniaŭ psichičnaha zdaroŭja samuju vysokuju ryzyku ŭjaŭlali razłady, źviazanyja sa stresam, takija jak, naprykład, posttraŭmatyčny stresavy razład (PTSR). Tak, ryzyka pavialičvajecca na 23%, kali na stresavy razład pakutavaŭ tolki baćka; na 47%, kali chvareła tolki maci; i ažno na 90% u vypadku najaŭnaści dyjahnazu ŭ abodvuch baćkoŭ. Ryzyka taksama pavialičvałasia, kali baćki mieli niekalki roznych psichičnych razładaŭ (naprykład, depresija razam z tryvožnym zasmučeńniem) adnačasova.

Čamu isnuje takaja suviaź?

Choć užo isnavali daśledavańni, jakija vyvučali suviaź psichičnych zachvorvańniaŭ u mam z pavyšanaj ryzykaj zaŭčasnych rodaŭ, pra rolu baćki ŭ hetym płanie było viadoma značna mienš. Asnoŭny miechanizm, chutčej za ŭsio, budzie składanym i daśledčyki pakul mohuć tolki mierkavać, što staić za hetaj suviaźziu.

Vierahodna, pakuta ad psichičnaha zachvorvańnia abo najaŭnaść partniora ź psichičnym zachvorvańniem źjaŭlajecca krynicaj stresu dla budučaj mamy. Jak vynik, bolš vysoki ŭzrovień harmonaŭ stresu ŭ arhaniźmie maci moža vyklikać zaŭčasnyja schvatki.

Daśledavańni pakazvajuć, što padtrymka baćki padčas ciažarnaści moža źmiakčyć nastupstvy maciarynskaha stresu. U adnym daśledavańni žančyny z chraničnym stresam, jakija mieli lepšuju padtrymku z boku baćki dziciaci (uklučajučy emacyjnuju i finansavuju), mieli mienšuju ryzyku zaŭčasnych rodaŭ.

Kali ž abodva baćki majuć psichičnaje zachvorvańnie, tady bolš vierahodna, što takoj padtrymki nie budzie. Akramia taho, u siemjach, dzie adzin abo abodva baćki majuć psichičnaje zachvorvańnie, mohuć uźnikać dadatkovyja faktary ryzyki, takija jak złoŭžyvańnie psichaaktyŭnymi rečyvami, paleńnie i nizki sacyjalna-ekanamičny status.

Pa danych SAAZ, prykładna kožny vośmy čałaviek u śviecie maje toj ci inšy psichičny razład. Budučyja daśledavańni pavinny vyvučyć, ci mohuć dadatkovaja sacyjalnaja padtrymka i darodavy dohlad dla siemjaŭ ź psichičnymi zachvorvańniami źnizić ryzyku zaŭčasnych rodaŭ, a taksama patencyjnyja nastupstvy psichijatryčnych lekaŭ i mietadaŭ lačeńnia.

• 0
• 0
• 0
• 0
• 0
• 1
• 3
• 0