Paviedamleńnie pra pamiłavańnie Su Čžy było pierabolšańniem. Ź jaje źniali šeść hadoŭ turmy, zastajecca jašče 27
Častkovaje pamiłavańnie eks-dziarždaradcy Mjanmy raspaŭsiudžvajecca tolki na piać abvinavaŭčych prysudaŭ.
Fota: Lauren DeCicca / Getty Images
Jak paviedamlałasia, eks-dziarždaradca Mjanmy Aun San Su Čžy (Aung San Suu Kyi) razam z 7700 inšymi źniavolenymi była pamiłavanaja ŭładami krainy. Ale pamiłavańnie tolki častkovaje.
Jak piša The Wall Street Journal, spasyłajučysia na zajavu, jakuju ŭ aŭtorak, 1 žniŭnia, raspaŭsiudzili dziaržaŭnyja ŚMI Mjanmy, Su Čžy była pamiłavanaja za piać pravaparušeńniaŭ, uklučajučy parušeńnie pravił karancinu z pryčyny Covid-19 i niezakonny ŭvoz partatyŭnych racyj.
Pradstaŭnik chunty Zo Min Tun (Zaw Min Tun) zajaviŭ žurnalistam, što pamiłavańnie skarocić termin źniavoleńnia Su Čžy na šeść hadoŭ. Heta značyć, što žančynie zastajecca adbyć jašče 27 hadoŭ pazbaŭleńnia voli, kali chunta nie ŭniasie dalejšych źmien abo rašeńniaŭ, jakija datyčać jaje.
Partyja Su Čžy, Nacyjanalnaja liha za demakratyju, pieramahła na vybarach u 2015 hodzie — pieršych svabodnych vybarach u krainie za čverć stahodździa. Praź piać hadoŭ, u 2020 hodzie, jana znoŭ atrymała pierakanaŭčuju pieramohu.
Tady vajskoŭcy zładzili dziaržaŭny pieravarot za niekalki hadzin da taho, jak parłamient mieŭsia sabracca na pieršuju siesiju paśla vybaraŭ, zatrymali Su Čžy dy inšych aficyjnych asob, u tym liku byłoha prezidenta Vin Mjinta, jaki taksama byŭ častkova pamiłavany 1 žniŭnia hetaha hoda.
Aun San Su Čžy, jakoj ciapier 78 hadoŭ, znachodzicca ŭ źniavoleńni ź lutaha 2021 hoda. Jak adznačaje vydańnie, advakaty Su Džy nie mohuć sustrecca ź joj sa śniežnia 2022 hoda. Taksama niemahčyma paćvierdzić paviedamleńni ab tym, što žančyna była niadaŭna pieraviedziena z turmy ŭ dom u stalicy krainy.
The Wall Street Journal adznačaje, što, pa acency palitołahaŭ, pamiłavańniem, jakoje było abvieščana 1 žniŭnia, kiraŭničaja chunta Mjanmy choča pakazać, nibyta jana hatovaja da źmienaŭ. Adnak zachodnija ŭrady naŭrad ci ŭsprymuć hety krok jak realnuju sastupku.
Dziaržaŭny pieravarot pierarvaŭ dziesiacihadovy praces pierachodu Mjanmy da demakratyi i viarnuŭ krainu ŭ status izhoja. Moładź masava pratestavała spačatku na vulicach, a kali sutyknułasia z žorstkim padaŭleńniem z boku ŭładaŭ, syšła partyzanić u lasy i hory. Uzbrojeny kanflikt raspaŭsiudziŭsia na ŭsiu krainu.
U paniadziełak, 31 lipienia, chunta praciahnuła nadzvyčajnaje stanovišča, faktyčna adkłaŭšy abiacanyja vybary da nastupnaha hoda, zajaviŭšy, što heta nieabchodna dla «stabilnaści».
U vyniku pieravarotu, adznačaje vydańnie sa spasyłkaj na Asacyjacyju dapamohi palityčnym źniavolenym, zahinuła bolš za 3800 čałaviek, a amal 20 tysiač zastajucca ŭ źniavoleńni.
Čytajcie jašče:
Mjanma: što adbyvajecca, kali siłaviki robiacca ŭładnaj kastaj
Byłuju lidarku Mjanmy pieraviali ŭ adzinočnuju kamieru. Raniej jaje asudzili na 11 hadoŭ
U Mjanmie padčas pratestaŭ za adzin dzień zabili bolš za 100 čałaviek. Siarod achviaraŭ jość dzieci
«Niezakonnyja partatyŭnyja racyi»: siłaviki vystavili abvinavačvańni zakonnym kiraŭnikam Mjanmy
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič10
Kamientary