Navumienka, Chrucki, Citovič… U čyj jašče honar nazvali novyja minskija vulicy?
Vosiem prajektavanych staličnych vulic i try zavułki atrymajuć nazvy ŭ honar viadomych biełaruskich dziejačaŭ. Rašeńnie pryniali ŭ Minskim haradskim Saviecie deputataŭ, jano ŭstupić u siłu paśla apublikavańnia, paviedamiła ahienctva «Minsk-Naviny».
Novyja taponimy źjaviacca ŭ mikrarajonie Paŭnočny i kompleksie «Paŭnočny bierah».
Vulicu i zavułak Paŭnočnaha mikrarajona nazavuć u honar narodnaha piśmieńnika Biełarusi Ivana Navumienki.
Inšym vulicy i zavułku ŭ tym samym rajonie prysvojać imia muzykaznaŭca i etnohrafa Hienadzia Citoviča. Jaho viedajuć jak arhanizatara i mastackaha kiraŭnika Dziaržaŭnaha akademičnaha narodnaha choru.
Urešcie, apošniaja para mikrarajona budzie nazvanaja ŭ honar biełaruskaha žyvapisca XIX stahodździa Ivana Chruckaha. Jon prasłaviŭsia svaimi naciurmortami. Frahmient «Partreta žonki z kvietkami i sadavinoj» aŭtarstva Chruckaha byŭ vyjaŭleny na kupiury tysiača biełaruskich rubloŭ 2000 hoda vypusku.
Dźvie vulicy kompleksu «Paŭnočny bierah» nazavuć imionami architektaraŭ Iosifa Łanhbarda i Alaksandra Voinava. Pieršy ŭ svoj čas značna paŭpłyvaŭ na vobraz Minska. Samyja viadomyja prajekty Łanhbarda ŭ stalicy — Vialiki teatr opiery i baleta, hałoŭny korpus Akademii navuk i Dom aficeraŭ.
Alaksandr Voinaŭ stvaraŭ prajekty žyłych damoŭ pa vulicy Maskoŭskaj i budynki, dzie siońnia znachodzicca haścinica Crowne Plaza.
Jašče dźvie vulicy ŭ «Paŭnočnym bierazie» nazavuć u honar mastakoŭ Paŭła Maślenikava i Vitala Ćvirki. Maślenikaŭ pisaŭ piejzažy i pracavaŭ mastakom-pastanoŭščykam u Teatry opiery i baleta, afarmlaŭ śpiektakli ŭ Teatry Janki Kupały. Vital Ćvirka taksama byŭ majstram piejzažnaha žyvapisu. Mnostva karcin jon pryśviaciŭ biełaruskaj pryrodzie.
Urešcie, piatuju vulicu ŭ hetym kompleksie nazavuć imieniem fizika, kolišniaha prezidenta Nacyjanalnaj akademii navuk Biełarusi Mikałaja Barysieviča. Jon zajmaŭsia kvantavaj elektronikaj, infračyrvonaj technikaj i inšymi kirunkami fizičnaj navuki.
Ivan Chrucki: drama za sałodkimi naciurmortami. Jak impieryja łamała adnaho z samych paznavalnych biełaruskich mastakoŭ
«Kali ja prynios hetyja talerki, va ŭsich byli kruhłyja vočy: «Vaŭ!». Dyrektar hatela «Jeŭropa» raskazaŭ pra varjacki kreatyŭ, ź jakim jon refarmuje ŭstanovu
U Minsku zahładzili apošnija ślady kinateatra «Sučaśnik». Tut budzie skvier
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary
Ale pra Vasila Bykava i Ryhora Baradulina znoŭ "zabyli"