Machlary vymańvajuć hrošy nie tolki ŭ małaadukavanych ludziej ci piensijanieraŭ. Voś jašče adna schiema, na jakuju moža papaścisia kožny
Kali da prahramista z dobrym prafiesijnym dośviedam (supracoŭnika mižnarodnaj IT-kampanii, ofis jakoj raniej byŭ i ŭ Biełarusi) u Linkedin z prapanovaj źmianić miesca pracy źviarnuŭsia patencyjny pracadaŭca, ničoha nie vyhladała padazrona. Sapraŭdy, mienavita tak rekrutary i papaŭniajuć štat arhanizacyi. I zarabotnaja płata, i ŭmovy pracy padalisia pryvabnymi, raspaviadaje historyju «Štodzień».
Było anłajn-sumoŭje, pieršy etap testavych zadańniaŭ — usio jak maje być. Zdavałasia, praca mary ŭžo amal atrymanaja.
Na druhim etapie ŭźnikli prablemy sa spampoŭvańniem materyjałaŭ, patrebnych dla vykanańnia zadańnia. U kampanii, što prapanoŭvała pracu, patłumačyli, što heta, mahčyma, praz vykarystańnie imi VPN, i dali spasyłku, pa jakoj možna atrymać danyja biez prablem.
A dalej — standartnaja schiema. Spasyłka była fišynhavaj.
Praź jaje machlary atrymali dostup nie tolki da adnaho noŭtbuka (tak jak usie pieramovy vialisia ŭ pracoŭny čas, testavyja zadańni hora-supracoŭnik vykonvaŭ nie na ŭłasnaj, a na pracoŭnaj technicy), ale i da ŭsich pryład kampanii, u tym liku i da tych, dzie zachoŭvalisia finansavyja danyja.
U vyniku kampanija straciła nie tolki davier da adnaho sa svaich supracoŭnikaŭ, ale i kryptavalutu ŭ ekvivalencie niekalki dziasiatkaŭ miljonaŭ jeŭra.
Heta nie ŭnikalnaja sprava. Takim čynam było abrabavana ŭžo nie adno pradpryjemstva ŭ roznych krainach. Ministerstva finansaŭ ZŠA jašče ŭ minułym hodzie papiaredžvała pra aktyvizacyju chakierskaj hrupoŭki Lazarus (miarkujecca, što takim čynam kibierrabaŭniki źbirajuć hrošy na papaŭnieńnie biudžetu Paŭnočnaj Karei).
Ciapier čytajuć
Kaardynatara pošukavaha atrada «Anioł» pasadzili za palityku1
Kamientary