Raniej «na ich dračyli», a «ciapier našy SSA abkłali hety łahier z usich bakoŭ». Biełaruskija aficery raskazali pra apošnija naviny vakoł «Vahniera»
«Naša Niva» spytała dziejnych aficeraŭ roznych rodaŭ vojskaŭ, jak jany aceńvajuć zabojstva Pryhožyna i znachodžańnie pad Asipovičami łahiera PVK «Vahnier».
«Da 24.06 jany byli ŭ pašanie i mnohija na ich dračyli — šaŭrony, nalepki na čachły, zastaŭki na telefon. Potym jak by ŭsio, choram usiu atrybutyku ŭ majoj čaści jak minimum paprybirali, niedzie starejšyja aficery sami mahli źviarnuć uvahu: voś, maŭlaŭ, tut u ciabie nieŭstanoŭlenaja atrybutyka, lepš ściah biełaruski prylapi jašče adzin.
Zdźmuła z vahniaroŭ flor hierojstva.
Ciapier jany ŭsprymajucca jak adno sa šmatlikich rasijskich śpiecpadraździaleńniaŭ, jakija i tak pryjazdžajuć na sumiesnyja vučeńni i abmien dośviedam u Biełaruś davoli časta.
Ale tut ža jak viecier padźmie. Pastupić kamanda — dyk usie budziem lubić i siabravać abo nienavidzieć i stralać», — skazaŭ nam adzin z našych surazmoŭcaŭ.
«Razumnyja ludzi ŭsio razumiejuć, i staŭleńnie ŭ ich i da hetych hałavarezaŭ, i da ich pravadyra adpaviednaje. Durnyja — abo abažajuć, abo ničoha kiepskaha nie bačać.
A što z hetymi ŭsimi najomnikami budzie dalej, ja nie viedaju, jak pa mnie, to PVK nijakaj užo nie isnuje: častka ŭ Biełarusi, častka ŭ Afrycy, častka ŭ Rasii. Nulavaja bajazdolnaść. Jany padzielenyja, a ich kamandzir pakarany śmierciu.
Napeŭna, u hetym i byŭ płan, kab ich bić nie pad Maskvoj, a pakarać śmierciu ŭsich kamandziraŭ kaho dzie, paasobku. I heta my pra inšych, chto tam byŭ u avanhardzie, jašče ničoha nie viedajem.
PVK, pa sutnaści, bolš nie isnuje: častka, ja dumaju, pojdzie na kantrakt u rasijskaje Minabarony, chtości na hramadzianku, samych tałkovych pasprabujuć zaachvocić zastacca ŭ Biełarusi na słužbie Łukašenku», — vykazaŭ mierkavańnie inšy aficer.
«Ad starejšych aficeraŭ čuŭ mierkavańnie, što nijakaha kałapsu ŭłady ŭ Rasii nie było, što nasamreč Pucin vybiraŭ, jak vyrašyć kanflikt i ničoha nie stracić, — ni Afryku, ni viarchoŭku svaich vajskoŭcaŭ, i što miaciež byŭ nie suprać jaho asabista i jaho ŭłady, a ŭ mužykoŭ kala jaho razyšlisia pohlady adzin na adnaho. I jak tolki jon prydumaŭ zrabić bazu ŭ Biełarusi, to «Vahnier» pierakinuli da nas — i tak kanflikt razruliŭsia. A Łukašenku ŭžo dazvolili abyhrać heta, jak jamu padabajecca.
Našy SSA [siły śpiecapieracyj] i śpiecpadraździaleńni abkłali hety łahier z usich bakoŭ i mianiali adno adnaho, ja tak razumieju, davier da hetaj kampanii byŭ nulavy, kali arhanizavali takija zachady biaśpieki.
A što tam budzie dalej, treba trochu pačakać, usio pabačym. Dumaju, što kali b była niejkaja sproba ŭzbuchnuć u Biełarusi paśla śmierci Pryhožyna, to my b ich tam pakłali vokam nie marhnuŭšy, u tym lesie», — dadaŭ aficer ź Sił śpiecapieracyj.
-
Polskaja daślednica biełaruskaj identyčnaści maryć pra pomnik «kułaku» ŭ Minsku i čakaje, kali Biełaruś znoŭ adkryjecca śvietu
-
Biełarus, jaki adsiadzieŭ u Tambovie, zavis miž niebam i ziamloj — Rasija choča departavać, a Biełaruś pytajecca: chto heta?
-
Mama studentki-vydatnicy raskazała pra vydatki na vypuskny
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud33
Kamientary