Hetym letam pačałasia raspracoŭka novaj płatformy, jakaja zmoža analizavać raznastajnyja ślady, pakinutyja kibierzłačyncami na lubych forumach i ŭ miesiendžarach.
Z novym prajektam aznajomilisia žurnalisty Le Monde. Jon finansujecca Fondam unutranaj biaśpieki Jeŭrapiejskaj kamisii, jaki padtrymlivaje inicyjatyvy, nakiravanyja na baraćbu z teraryzmam, ciažkimi złačynstvami i kibierzłačynnaściu ŭ Jeŭrapiejskim sajuzie.
Kaardynataram vystupić CIVIPOL — apieratar mižnarodnaha techničnaha supracoŭnictva Ministerstva ŭnutranych spraŭ Francyi. Akramia francuzskaj palicyi, u prajekcie buduć brać udzieł palicyi Hiermanii, Rumynii i Estonii.
Vynikam prajekta maje stać płatforma Aronnax. Śpiecyjalisty spadziajucca, što jana pačnie pracavać letam 2025 hoda i dazvolić spraścić abmien danymi ab pakinutych chakierami śladach u internecie pamiž śledčymi z čatyroch krain-udzielnic. U pierśpiektyvie hety instrumient moža być adkryty dla inšych krain.
Sutnaść
Śpiecyjalisty śćviardžajuć, što, niahledziačy na toje, što kibierzłačynnaść ujaŭlaje saboju decentralizavany «biznes», jaki schavany ŭ darknecie, prasačyć ślady možna.
«Kali imia karystalnika, adras elektronnaj pošty, bankaŭski rachunak abo adras virtualnaha kašalka źjaŭlajucca ŭ niekalkich miescach, imavierna, za imi staić adzin i toj ža čałaviek abo arhanizacyja. Niekatoryja chakiery taksama nienaŭmysna raskryvajuć svoj IP-adras abo raźmiaščeńnie svaich siervieraŭ. My taksama možam praanalizavać radki koda abo apieracyjnyja pracedury, kab ubačyć, ci byli jany zaŭvažanyja dzie-niebudź jašče», — patłumačyŭ Le Monde francuzski śpiecyjalist pa kibierbiaśpiecy.
Mienavita hetyja padkazki, pieradadzienyja śledčymi, majuć zachoŭvacca i kłasifikavacca ŭ bazie danych Aronnax. Zatym, kali śledčy sustrakaje imia karystalnika, adras elektronnaj pošty ci IP-adras na forumie abo ŭ słužbie abmienu paviedamleńniami, jakimi karystajucca kibierzłačyncy, jon zmoža ŭbačyć, ci zjaŭlaŭsia hety «markier» u inšych rasśledavańniach, i atrymać dostup da infarmacyi, sabranaj kalehami. Heta pavinna spryjać supracoŭnictvu i abmienu raźvieddanymi pamiž słužbami roznych krain.
Jak piša Le Monde, raźmierkavańnie rolaŭ krain u Aronnax adpaviadaje raźmierkavańniu rolaŭ u inšaj jeŭrapiejskaj inicyjatyvie Empact, nakiravanaj na baraćbu z arhanizavanaj złačynnaściu i abjadnoŭvaje nacyjanalnyja palicyi i jeŭrapiejskija ahienctvy biaśpieki.
Fiederalnaja kryminalnaja palicyja Hiermanii, jakaja adkazvaje za zbor infarmacyi ab kibierzłačyncach u ramkach Empact, budzie adkazvać za ahrehavańnie danych, pradstaŭlenych na płatformie Aronax. U hetym joj budzie dapamahać Estonija. Francyja, jakaja ŭ ramkach Empact kaardynuje baraćbu z kibierzłačynnaściu, budzie vykonvać padobnuju rolu i ŭ novym prajekcie. Joj budzie dapamahać Rumynija.
Čytajcie jašče:
Prajekt «Piehas» — revalucyja ŭ špijanažy
Štučny intelekt navučyŭsia movie darknetu i ciapier moža raspaznavać kibierpahrozy
Ich bajacca dziaržavy i biznes — za kapiejki jany mohuć pazbavić miljonaŭ. Što takoje DDoS-ataka
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary