Łukašenka: Vałodańnie ruskaj movaj — naš najvialikšy zdabytak. Navošta my hublajem ruskuju movu?
Alaksandr Łukašenka ŭ svaim vystupie na samicie kiraŭnikoŭ SND u Biškieku nazvaŭ vielmi svoječasovaj i zapatrabavanaj inicyjatyvu prezidenta Kazachstana Kasym-Žamarta Takajeva ab zasnavańni mižnarodnaj arhanizacyi pa ruskaj movie.
«Vy viedajecie, my siońnia ŭsie razmaŭlajem na ruskaj movie, tamu nie tak vostra adčuvajem hetuju kałasalnuju prablemu. A pahladzicie na moładź u našych respublikach. Mnohija razmaŭlajuć na ruskaj movie horš i słabiej, čym na anhlijskaj i inšaj movie. Heta (vałodańnie ruskaj movaj) najvialikšy naš zdabytak. Možam dastukacca da taho, što budziem razmaŭlać praź pierakładčyka. Niamožna stracić movu mižnacyjanalnych znosin, jak jaje nazyvajuć. I potym, ja naohuł nie razumieju, a čamu jaje pavinny stracić? Jana što, škodzić nam, našamu pakaleńniu? Nie. Jana nie pavinna škodzić i pakaleńniu našych dziaciej. Heta naš zdabytak», — cytuje słovy Łukašenki jahonaja pres-słužba.
Alaksandr Łukašenka padkreśliŭ, što zaŭsiody havaryŭ ab tym, što ruskaja mova — heta nie ruskaja mova:
«Heta naša ahulnaja mova. My byli ŭ adzinaj dziaržavie doŭhi čas. A zychodziačy z kancepcyi, što mova — heta žyvoje, tvorča raźvivajecca, dyk my ž razam raźvivali hetuju ruskuju movu. Tam čaścinka azierbajdžancaŭ, uźbiekaŭ, tadžykaŭ i hetak dalej. Nie tolki ruskich i biełarusaŭ. Tamu navošta my hublajem ruskuju movu?»
Jon adznačyŭ, što jaho raduje tendencyja ŭ siarednieazijackich krainach, uklučajučy Tadžykistan, Kyrhyzstan, Uźbiekistan, dzie źjaŭlajucca novyja škoły i ŭniviersitety, u jakich vyvučajuć i vykładajuć na ruskaj movie.
«Ale hetaha mała. Tamu voś hetaja inicyjatyva pa ruskaj movie — heta nie mienš važnaja inicyjatyva, čym niejkaja z vobłaści ekanomiki. Ja ŭžo nie kažu pra toje, jak iduć spravy ŭ nas z ruskaj movaj u byłoj Varšaŭskaj damovie (u dziaržavach, jakija ŭvachodzili ŭ hetaje abjadnańnie). My, u adroźnieńnie ad ich, nie chočam, kab naša moładź kamunikavała, jak ja ŭžo skazaŭ, pamiž saboj praź pierakładčyka abo tolki na anhlijskaj movie», — padkreśliŭ Łukašenka.
Ciapier čytajuć
Cichanoŭski raskazaŭ, jak siabie pavodziŭ Kola Łukašenka na sustrečy ŭ SIZA12
Kamientary