Łukašenka ŭvioŭ novyja abmiežavańni dla rezidentaŭ «niedružalubnych» krain
Dla pradpryjemstvaŭ, zasnavalnikami jakich źjaŭlajucca asoby z «niedružalubnych» krain, abmiežavany prodaž nieruchomaj majomaści, a dla transpartu krain Jeŭrasajuza padvysiać košt strachovak i pasłuh pa pierahruzcy i pieračepcy. Hetyja i inšyja miery praduhledžanyja ŭkazam № 326, jaki 19 kastryčnika padpisaŭ Alaksandr Łukašenka, piša Office Life.
Tekst dakumienta pakul nie apublikavany. Ale ŭ značnaj častcy jon faktyčna pradaŭžaje termin dziejańnia ŭkaza № 93 ad 14 sakavika 2022 hoda «Ab dadatkovych mierach pa zabieśpiačeńni stabilnaha funkcyjanavańnia ekanomiki».
Novym źjaŭlajecca ŭviadzieńnie miechanizma adčužeńnia hramadzianami «niedružalubnych» krain dolaŭ u statutnych fondach (akcyj), jakija im naležać, a taksama nieruchomaj majomaści biełaruskich pradpryjemstvaŭ. Zaraz takija pahadnieńni buduć mahčymyja tolki z dazvołu ŭrada i pry ŭmovie vypłaty ŭ miascovy biudžet 25% rynkavaha koštu adčužanaj majomaści.
Akramia taho, Saŭminu dazvolena pavialičvać pamiery strachavych unioskaŭ pry kupli biełaruskich polisaŭ aŭtastrachavańnia dla transpartnych srodkaŭ ź dziaržaŭ, jakija razarvali ź Biełaruśsiu dvuchbakovyja pahadnieńni ab abaviazkovym strachavańni hramadzianskaj adkaznaści.
Vierahodna, taksama budzie pavyšany košt pasłuh pa pierahruzcy i pieračepcy dla hruzavoha transpartu krain ES, bo dla jurydyčnych asob, jakija akazvajuć im takija pasłuhi, ustanoŭleny dadatkovy zbor u pamiery 0,8 bazavaj vieličyni z kožnaj pasłuhi.
Ukaz № 93 byŭ pryniaty paśla ŭviadzieńnia šeraham krain sankcyj suprać Biełarusi. Jon byŭ nazvany mieraj, jakaja ŭvodzić abmiežavańni ŭ adkaz dla rezidentaŭ «niedružalubnych» krain.
Ciapier čytajuć
Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka28
Kamientary