«Heta prosta duraść vajennaja». Žurnalisty pahavaryli z tymi, chto vyžyŭ paśla rakietnaha ŭdaru ŭ čas uznaharodžańnia najlepšych ukrainskich vajskoŭcaŭ

Jak paviedamlałasia raniej, rasijskija vojski 3 listapada nanieśli ŭdar rakietaj «Iskander M» pa ŭkrainskich vajskoŭcach pad čas cyrymonii ŭznaharodžańnia ŭ honar Dnia artyleryi ŭ Zaparožskaj vobłaści. Zahinuła 19 bajcoŭ 128-j asobnaj horna-šturmavoj bryhady, dziasiatki ludziej atrymali ranieńni.

Karespandenty The Washington Post pahavaryli z tymi, chto vyžyŭ. Vajennyja na ŭmovach ananimnaści paraŭnali cyrymoniju z tymi, što adbyvalisia ŭ savieckuju epochu, sa scenami z rasijskich prapahandysckich filmaŭ ab Druhoj suśvietnaj vajnie.

Žachlivyja straty ŭźniali vostryja pytańni ab tym, čamu takoje bujnoje publičnaje mierapryjemstva było praviedziena ŭ miescy, jakoje było lohka vidać rasijskim bieśpiłotnikam i znachodziłasia ŭ miežach dasiažnaści rasijskich rakiet, jakija (pavodle niekatorych źviestak ich było dźvie), byli vypuščany praz 10 chvilin paśla pačatku cyrymonii.

Jak adznačyli vydańniu surazmoŭcy, zvyčajna takija cyrymonii ŭznaharodžańnia nievialikija, na ich prysutničaje kala 30 čałaviek, i jany prachodziać u dobra abaronienym bunkiery ci tranšei. Adnak 3 listapada zbor prajšoŭ na adkrytaj placoŭcy, i ŭ im pryniali ŭdzieł kala 100 čałaviek, u tym liku tyja, chto nie byŭ uznaharodžany.

«Jany sabrali ludziej z usich častak — najlepšych ludziej. U śpisie [tych, chto ŭznaharodžany] było 43 čałavieka. Nasamreč, ludziej było značna bolš», — cytuje vydańnie słovy ŭkrainskaha vajskoŭca.

Pa słovach inšaha bajca, miesca praviadzieńnia cyrymonii «pastajanna znachodzicca ŭ miežach dasiažnaści ŭdaraŭ balistyčnych rakiet i ŭsiaho astatniaha, što lacić zdaloku».

Jak adznačaje vydańnie, rakieta patrapiła va ŭnutrany dvor budynku, dzie prachodziła cyrymonija, a taksama paškodziła bližejšuju darohu.

Šmat chto z prysutnych atrymaŭ traŭmy hałavy, bo byŭ na cyrymonii biez šlemaŭ.

«Miedyki skazali, što ničoha padobnaha jany nie bačyli z pačatku poŭnamaštabnaj vajny», — pieradaje vydańnie słovy adnaho z prysutnych.

Pieršapačatkova ŭłady nie paviedamili ab incydencie. Spačatku infarmacyjaj abmieńvalisia rodnyja tych, chto zahinuŭ. Jak skazaŭ adzin z surazmoŭcaŭ The Washington Post, kab svajaki vajskoŭcaŭ nie «padniali kryk» u sacsietkach, «to nichto b i nie daviedaŭsia».

Naviny ab rakietnym udary pačali prasočvacca ŭ sacyjalnyja sietki ź viečara piatnicy. Bližej da niadzieli ŭkrainskija ahienctva navin paviedamili ab napadzie, a ministr abarony Ukrainy Rustem Umieraŭ zajaviŭ, što ŭ bryhadzie adbyłasia «trahiedyja», ale nie paviedamiŭ nijakich padrabiaznaściaŭ. Paźniej 128-ja bryhada apublikavała kolkaść tych, chto zahinuŭ, na svajoj staroncy ŭ Facebook.

U paniadziełak Dziaržaŭnaje biuro rasśledavańniaŭ Ukrainy zajaviła, što ŭzbudžaje kryminalnuju spravu pa faktach napadu pa artykule «chałatnaje staŭleńnie vajennaha słužačaha da słužby».

Prezident Uładzimir Zialenski vykazaŭ spačuvańni siemjam tych, chto zahinuŭ, i zajaviŭ, što kamandzir bryhady Dźmitryj Łysiuk adchileny ad pasady na čas rasśledavańnia.

U svaim vystupie ŭ niadzielu Zialenski adznačyŭ, što heta była «trahiedyja, jakoj možna było paźbiehnuć». Pa słovach prezidenta, usia situacyja analizujecca štochvilinna, i «budzie ŭstanoŭlena, chto kankretna parušyŭ praviły biaśpieki ludziej u rajonie dostupu aeraraźviedki voraha. Nijakaha paźbiahańnia adkaznaści».

Adnak hałoŭnaje pytańnie, na jakoje źviartajuć uvahu subiasiedniki The Washington Post, heta pytańnie ab tym, jak rasijskija vajennyja daviedalisia ab miescy i časie praviadzieńnia cyrymonii.

«Pakul niezrazumieła, što mienavita adbyłosia, — ci to miascovyja žychary patelefanavali i paviedamili, što sabrałasia šmat ludziej, ci adbyłasia ŭciečka infarmacyi z unutranych štaboŭ bryhad», — pryvodzić vydańnie słovy adnaho z bajcoŭ.

Pa słovach subiasiednika, taki ŭdar nielha spłanavać biez papiaredniaj padrychtoŭki:

«Nielha zapuścić rakietu za dźvie chviliny abo za 15. Kali praciŭnik nakiravaŭ tudy rakietu, jon vydatna razumieŭ, što tam šmat kiraŭnictva i ŭdar budzie dastatkova mahutnym».

Pa słovach inšaha bajca, «usie złujucca na kamandavańnie. Jany mahli addać zahad pieranieści ŭsio ŭ inšaje miesca ci jakoje-niebudź schovišča. Pieraniasicie ŭsio i praviadzicie cyrymoniju tam. Čamu hetaha nie adbyłosia, ja nie viedaju. Heta prosta duraść vajennaja».

Adnak navat paśla trahiedyi, piša vydańnie, niekatoryja čynoŭniki vystupili ŭ abaronu praktyki ŭznaharodžańnia miedalami pablizu zony bajavych dziejańniaŭ. Byłaja namieśnica ministra abarony Hanna Malar zajaviła, što cyrymonii zjaŭlajucca «vielmi važnaj častkaj» vajennaj kultury.

Pa jaje słovach, rasijanie mahli daviedacca ab cyrymonii z-za «nienaŭmysnaj uciečki infarmacyi», vyklikanaj «čałaviečym faktaram».

«U suviazi z tym, što poŭnamaštabnaja vajna praciahvajecca ŭžo bolš za hod, pačućcio niebiaśpieki ŭ mnohich sprytupiłasia. Čałavieku ciažka pastajanna znachodzicca ŭ stanie pavyšanaj uvahi i kancentracyi pry ryzycy śmierci»,

— pryvodzić vydańnie słovy Malar.

Na dumku ž bajcoŭ, praktyka cyrymonij u savieckim styli pavinna być nieadkładna spyniena. «Sałdaty i aficery bajacca, što heta nie budzie zroblena i ŭsio moža, nie daj boh, paŭtarycca»,

— cytuje adnaho ź ich The Washington Post.

Čytajcie jašče:

Va USU nazvali kolkaść vajskoŭcaŭ, jakija zahinuli ŭ Zaparožskaj vobłaści padčas uznaharodžvańnia

Rasijskaja rakieta prylacieła ŭ miesca, dzie ŭznaharodžvali ŭkrainskich vajskoŭcaŭ. Zahinuli bolš za 20 čałaviek

• 9
• 0
• 4
• 10
• 0
• 34
• 45
• 0