U polskim Lublinie źniali z ratušy ŭkrainski ściah praz rašeńnie Zialenskaha nakont «padraździaleńnia UPA»
Haradskija ŭłady prybrali ŭkrainski ściah z budynka ratušy, jaki byŭ vyviešany tam jašče ŭ 2022 hodzie ŭ znak salidarnaści, paviedamlaje RBK-Ukraina.
Pryčynaj staŭ ukaz prezidenta Ukrainy Uładzimira Zialenskaha ab prysvajeńni padraździaleńniu Sił śpiecyjalnych apieracyj «Poŭnač» hanarovaha najmieńnia «imia Hierojaŭ UPA». Ukaz vyklikaŭ rezkuju reakcyju ŭ Polščy — ad Ministerstva zamiežnych spraŭ da prezidenta Naŭrockaha.
Ratuša Lublina raspaŭsiudziła zajavu, u jakoj adznačajecca, što horad dałučyŭsia da inšych polskich haradoŭ. Haradskija ŭłady padzialajuć krytyčnuju pazicyju polskaha MZS i pasolstva Polščy ŭ Kijevie adnosna rašeńnia Zialenskaha.
«Usłaŭleńnie farmiravańniaŭ, adkaznych za złačynstvy suprać mirnaha nasielnictva, nanosić bol pamiaci polskich achviar i ŭskładniaje pabudovu ščyraha dyjałohu», — adznačyli ŭ haradskoj radzie.
U toj ža čas Lublin padkreślivaje, što zastajecca sajuźnikam Ukrainy ŭ baraćbie za niezaležnaść i terytaryjalnuju cełasnaść.
«My nie bačym supiarečnaści pamiž abaronaj histaryčnaj praŭdy i salidarnaściu z narodam, jaki staŭ achviaraj ahresii», — havorycca ŭ zajavie.
Siarod žycharoŭ horada mierkavańni adnosna źniaćcia ściaha padzialilisia. Adny padtrymlivajuć hetaje rašeńnie, spasyłajučysia na nieprymalnaje, na ich dumku, ŭsłaŭleńnie Ukrainskaj paŭstanckaj armii, jakaja zmahałasia z polkimi farmavańniami padčas Druhoj suśvietnaj.
Inšyja ličać jaho niedarečnym zaraz, adznačajučy, što ŭkraincy dahetul vajujuć na pieradavoj suprać rasijskich vojskaŭ.
26 maja Zialenski padpisaŭ ukaz ab prysvajeńni Asobnamu centru śpiecyjalnych apieracyj «Poŭnač» hanarovaha najmieńnia «imia Hierojaŭ UPA» za ŭzornaje vykanańnie bajavych zadač.
U adkaz prezident Polščy Karal Naŭrocki zajaviŭ, što razhladaje mahčymaść pazbaŭleńnia Zialenskaha najvyšejšaj dziaržaŭnaj uznaharody respubliki.
Ministerstva zamiežnych spraŭ Ukrainy adkazała, što Kijeŭ nie mieŭ namieru abražać polski narod — dla Ukrainy UPA simvalizuje vyklučna supraciŭ maskoŭskaj impierskaj palitycy.
Ciapier čytajuć
Novy pasoł Ukrainy pa pytańniach Biełarusi: «Pryznajom Cichanoŭskuju lidaram. A ŭ Łukašenki niama manapolii na hołas naroda»69
Kamientary