«Uklučalisia šlacham šantažu i pahroz». Pa spravie maršrutčykaŭ KDB uziaŭsia za ahrehatar «Atłas»

Pramym tekstam nazvu ahrehatara ŭ siužecie, praŭda, nie nazvali, ale ŭ im prahučali proźviščy jaho ŭładalnikaŭ — Fundatar i Dancoŭ. Andrej Dancoŭ i Uładzimir Fundatar — zasnavalniki ahrehatara «Atłas» (na hety fakt źviarnuŭ uvahu Reform.by).

Namieśnik načalnika śledčaha ŭpraŭleńnia KDB Biełarusi Kanstancin Byčak zajaviŭ:

«Tak, uładalniki adnaho z najbujniejšych internet-ahrehataraŭ — Fundatar i Dancoŭ — abjadnali bolš za 300 pieravozčykaŭ, daŭšy im dostup da klijenckich baz. U jakaści ŭmovy nadańnia takoha dostupu była vyłučanaja rehularnaja pieradača niaŭličanych najaŭnych srodkaŭ. Z metaj vykanańnia hetaj umovy pieravozčyki chavali abjomy ŭłasnaj vyručki šlacham nieabilečvańnia pasažyraŭ, vykanańnia niaŭličanych rejsaŭ. I častku hrašovych srodkaŭ, jakija ŭtvarylisia takim čynam, pieradavali ŭładalnikam hetaj internet-płatformy. Takija dziejańni pryviali da pryčynieńnia škody dziaržavie ŭ vyhladzie niavypłaty padatkaŭ u bujnym pamiery».

Pry hetym «Atłas» vioŭ, maŭlaŭ, niadobrasumlennuju baraćbu z kankurentami, imknuŭsia ŭciahnuć u svajo koła ledź nie kožnaha maršrutčyka. «Šantaž, pahrozy zdać kankurenta ananimnym zvankom — ich styl pracy. Pravučyć sprabavali, zładziŭšy štučnuju bojku, padasłaŭšy pravakatara, pryčym pravakataram mahła być i žančyna. Zadača — vystavić niepažadanaha kiroŭcu ŭ niavyhadnym śviatle!»

Byčak śćviardžaje:

«Pieravozčyki, jakija žadali vieści biznes niezaležna ad uładalnikaŭ hetaha internet-resursu, uklučalisia ŭ złačynnuju dziejnaść šlacham šantažu i pahroz. Mieli miesca vypadki, kali da vykanańnia rehularnych mižharodnich pieravozak pryciahvalisia subjekty, jakija nie mieli adpaviednaha śpiecyjalnaha dazvołu i nie adpaviadali patrabavańniam biaśpieki, jakija pradjaŭlajucca da rehularnych pieravozčykaŭ, što staviła pad pahrozu žyćcio i zdaroŭje pasažyraŭ».

Ahulnaja vyručka kamiercyjnych struktur, jakija abjadnała płatforma, u 2022 hodzie skłała, jak śćviardžajecca, bolš za 50 miljonaŭ rubloŭ. Pry hetym nibyta jość źviestki, što zvyš za 10 miljonaŭ nichto nie ŭnios u padatkovyja dekłaracyi. Hadavy ž abarot pa krainie, pa samych ścipłych padlikach, moh być zvyš za 30 miljonaŭ biełaruskich rubloŭ.

Dziejańni ŭdzielnikaŭ hetaj hrupy kvalifikavanyja pa artykule 243 Kryminalnaha kodeksa Respubliki Biełaruś «Uchileńnie ad vypłaty padatkaŭ». U jakaści abvinavačanych i padazravanych pryciahnuta bolš za 20 čałaviek. 

• 6
• 0
• 9
• 19
• 5
• 2
• 12
• 0