«Уключаліся шляхам шантажу і пагроз». Па справе маршрутчыкаў КДБ узяўся за агрэгатар «Атлас»
На тэлеканале «Беларусь 1» выйшаў сюжэт пра «дарожныя войны» маршрутак, з якога стала зразумела, пра які менавіта буйны інтэрнэт-агрэгатар ідзе гаворка ў заведзенай КДБ крымінальнай справе.
Прамым тэкстам назву агрэгатара ў сюжэце, праўда, не назвалі, але ў ім прагучалі прозвішчы яго ўладальнікаў — Фундатар і Данцоў. Андрэй Данцоў і Уладзімір Фундатар — заснавальнікі агрэгатара «Атлас» (на гэты факт звярнуў увагу Reform.by).
Намеснік начальніка следчага ўпраўлення КДБ Беларусі Канстанцін Бычак заявіў:
«Так, уладальнікі аднаго з найбуйнейшых інтэрнэт-агрэгатараў — Фундатар і Данцоў — аб'ядналі больш за 300 перавозчыкаў, даўшы ім доступ да кліенцкіх баз. У якасці ўмовы надання такога доступу была вылучаная рэгулярная перадача няўлічаных наяўных сродкаў. З мэтай выканання гэтай умовы перавозчыкі хавалі аб'ёмы ўласнай выручкі шляхам неабілечвання пасажыраў, выканання няўлічаных рэйсаў. І частку грашовых сродкаў, якія ўтварыліся такім чынам, перадавалі ўладальнікам гэтай інтэрнэт-платформы. Такія дзеянні прывялі да прычынення шкоды дзяржаве ў выглядзе нявыплаты падаткаў у буйным памеры».
Пры гэтым «Атлас» вёў, маўляў, нядобрасумленную барацьбу з канкурэнтамі, імкнуўся ўцягнуць у сваё кола ледзь не кожнага маршрутчыка. «Шантаж, пагрозы здаць канкурэнта ананімным званком — іх стыль працы. Правучыць спрабавалі, зладзіўшы штучную бойку, падаслаўшы правакатара, прычым правакатарам магла быць і жанчына. Задача — выставіць непажаданага кіроўцу ў нявыгадным святле!»
Бычак сцвярджае:
«Перавозчыкі, якія жадалі весці бізнэс незалежна ад уладальнікаў гэтага інтэрнэт-рэсурсу, уключаліся ў злачынную дзейнасць шляхам шантажу і пагроз. Мелі месца выпадкі, калі да выканання рэгулярных міжгародніх перавозак прыцягваліся суб'екты, якія не мелі адпаведнага спецыяльнага дазволу і не адпавядалі патрабаванням бяспекі, якія прад'яўляюцца да рэгулярных перавозчыкаў, што ставіла пад пагрозу жыццё і здароўе пасажыраў».
Агульная выручка камерцыйных структур, якія аб'яднала платформа, у 2022 годзе склала, як сцвярджаецца, больш за 50 мільёнаў рублёў. Пры гэтым нібыта ёсць звесткі, што звыш за 10 мільёнаў ніхто не ўнёс у падатковыя дэкларацыі. Гадавы ж абарот па краіне, па самых сціплых падліках, мог быць звыш за 30 мільёнаў беларускіх рублёў.
Дзеянні ўдзельнікаў гэтай групы кваліфікаваныя па артыкуле 243 Крымінальнага кодэкса Рэспублікі Беларусь «Ухіленне ад выплаты падаткаў». У якасці абвінавачаных і падазраваных прыцягнута больш за 20 чалавек.
Цяпер чытаюць
«Усё так ці інакш будзе вырашацца на полі бою». Чым будзе займацца новая кіраўніца Місіі дэмакратычнай Беларусі ва Украіне?14
Каментары