Film pra «piekła Akreścina» pieramoh na «Bulbamuvi»

Stužka, u jakoj sabranyja śviedčańni biełarusaŭ, što pieražyli represii ŭ žniŭni-vieraśni 2020 hoda, była padtrymana Aŭdyjovizualnym instytutam Filmateka Narodowa ŭ siekcyi «Maładoha kino», paviedamlaje Reform.by.

Tania Śvirepa ŭ jakaści ŭznaharody atrymała mahčymaść karystacca archivami Filmateki — joj pradastaŭleny limit zakazaŭ na sumu 15 tysiač złotych (3750 dalaraŭ).

Film «Biełaruś 23.34» raspaviadaje pra padziei žniŭnia 2020 hoda i ludziej, jakija trapili ŭ «piekła» Akreścina.

Heta treciaja karcina režysiorki paśla jaje dakumientalnych pracaŭ — «Niekalki słoŭ pra maju maci i jaje sabaku» i «Čyściec». Karcina składajecca z vytrymak z 25 intervju biełarusaŭ, jakija pieražyli hvałt, i paŭstaje jak šakujučaja chronika bolu: ad 19-hadovaha junaka da 69-hadovaj piensijanierki — biełarusy havorać «ź blizkaj dystancyi» pra toje, što im daviałosia vytrymać.

Tani Śvirepie ŭdałosia stvaryć videadakumient, jaki fiksuje złačynstva ŭładaŭ, i adnačasova film, u jakim hołas pieratvaraje achviaru ŭ śviedku. Kamiera fiksuje emocyi ludziej — i heta razmova, jakuju ciažka vytrymać.

Ale hałasy źbirajucca ŭ chor — i heta chor, jaki nie daje tamu, što adbyłosia, być ściortym z pamiaci.

Pa sutnaści, hledaču karciny prapanujecca prajści šlach, pačynajučy ad hałasavańnia na ŭčastkach, i dalej — čakańnia jaho vynikaŭ la škołaŭ, abureńnie ahučanymi ličbami i reakcyi na padman. I dalej — pratesty na vulicy, razhon demanstracyi, užyvańnie śviatłošumavych hranataŭ, humavych kulaŭ siłavikami ŭ dačynieńni biazzbrojnych biełarusaŭ, traŭmy, zabojstva, zatrymańni, i hvałt, hvałt, hvałt — u aŭtazaku, u RAUS, na Akreścina, u kamierach…

Katavańni — choładam, hoładam, psichałahičnaje, fizičnaje… Złačynstva, jakoje da hetaj pary nie asudžana, nie aceniena ŭ svaich pamierach, — biełaruski hladač, u pryvatnaści, viartajecca ŭ adzin z samych strašnych svaich kašmaraŭ. Jon nie źnik, niahledziačy na namahańni ŭładaŭ «pierieviernuť stranicu». I hieroi karciny śviedčać pra jaho.

Tania Śvirepa paśpieła zachavać na kamieru śviedčańni paciarpiełych u 2020 hodzie ludziej, vyvieźci materyjał u Kijeŭ, potym — u Polšču, i zrabić film, jaki pry prostym žurnalisckim padychodzie, maje svaju intanacyju i abličča. Admietnaść «Biełaruś 23.34» — u empatyi da hierojaŭ, svoječasovaści; jana — taksama i ŭ mantažy, jaki źbiraje intervju i chroniku ŭ ahulnuju karcinu.

Konkursnaja prahrama 9-ha fiestyvalu biełaruskich filmaŭ «Bulbamuvi» składałasia z dvuch vialikich błokaŭ maładoha biełaruskaha kino.

Hetaksama na forumie adbylisia premjery: dvuch epizodaŭ sieryjału telekampanii «Biełsat» «Pracesy» (režysior Andrej Kašpierski), paŭnamietražnaj karciny «Raźvitańnie» Jakuba Stankieviča, karotkaha mietra «Bacian» Januša Haŭryluka, dakumientalnaj stužki «Takoha kštałtu nadzieja» pra Andreja Sańnikava (režysior Pavieł Siŭčyk), filmaŭ «U pošukach Daniiła Ivanova» Kaciaryny Jadłavieckaj, «Da apošniaha» Kaciaryny Karpovič, «Tak šmat i tak mała» Alaksandra Matafonava.

• 7
• 0
• 0
• 0
• 0
• 0
• 0
• 0