U zaaparku Maniły pamierła 40-hadovaja słanicha Mali. Jaje nazyvali samym sumnym słanom u śviecie
Amal usio žyćcio Mali pražyła ŭ słanovym zahonie ŭ samocie.
Mali pražyła ŭ zaaparku Maniły bolš za 40 hadoŭ, dzie była adnoj ź jaho hałoŭnych słavutaściaŭ. Ale jaje samota ŭžo daŭno vyklikała hnieŭ aktyvistaŭ, znakamitaściaŭ i prostych ludziej, jakich jaje sumnaja dola kranała da śloz, piša Bi-bi-si.
Adnym ź ich byŭ Poł Makartni, jaki nieadnarazova prasiŭ ułady pieravieści jaje ŭ słanovy zapaviednik.
Pra śmierć Mali abviaściła mer Maniły Chani Łakuna. U videaroliku ŭ siabie ŭ fejsbuku jana raspaviała, što vizity ŭ zaapark, dzie jana hladzieła na słanichu, adnosiacca da liku jaje samych radasnych dziciačych uspaminaŭ.
Historyja chvaroby
Aściarohi z pryčyny zdaroŭja słanichi ŭźnikli ŭ minułuju piatnicu, kali słužycieli i hości zaŭvažyli, što jana ŭvieś čas trecca chobatam ab ścianu, heta słužyła vidavočnaj prykmietaj taho, što joj baluča. Pra heta paviedamiŭ hałoŭny vieterynar zaaparka doktar Hienrych Patryk Pieńja-Daminha.
Ranicaj u aŭtorak Mali ŭžo nie mahła padniacca na nohi, a tolki lažała na baku i ciažka dychała. Vieterynar prapisaŭ joj antyhistaminnyja srodki (preparaty suprać alerhičnych reakcyj) i vitaminy, ale ŭviečary jaje ŭžo nie stała.
Praviedzienaje ŭskryćcio pakazała, što ancihistaminnyja joj byli niepatrebnyja: u jaje vyjaviŭsia rak padstraŭnikavaj załozy i tłuščavyja adkłady ŭ aorcie.
Na pres-kanfierencyi Daminha skazaŭ, što pryčynaj śmierci stała vostraja sardečnaja niedastatkovaść.
Jon kateharyčna adchiliŭ abvinavačvańni ŭ tym, što vieterynary i supracoŭniki zaaparka kiepska stavilisia da fizičnaha i dušeŭnaha zdaroŭja słanichi. «My ŭsie byli jaje siamjoj», — zapeŭniŭ jon.
Samota daŭžynioj u 33 hady
Mali, poŭnaje imia jakoj było Višva Maali, była padorana byłoj pieršaj łedzi Filipin Imieldzie Markas uradam Šry-Łanki ŭ 1981 hodzie, kali słanisie było ŭsiaho 11 miesiacaŭ.
U toj čas u zaaparku Maniły žyŭ jašče adzin słon, Šyva, jaki, adnak, pamior u 1990 hodzie. Z taho času Mali była adzinym słanom u zaaparku i adnoj ź jaho hałoŭnych słavutaściaŭ.
U razhar pandemii Covid-19 u zaaparku adkryli centr vakcynacyi, i słanicha zabaŭlała pryviezienych na pryščepki dziaciej.
Aktyvisty-zoaabaroncy ŭžo daŭno krytykavali ŭmovy ŭ zaaparku Maniły i kazali, što jaho piersanał niedastatkova padrychtavany dla taho, kab u vypadku nieabchodnaści akazać Mali nieabchodnuju miedycynskuju dapamohu.
Jany patrabavali adpuścić jaje na volu, ale administracyja śćviardžała, što dla samoj słanichi budzie lepš, kali jana zastaniecca ŭ zaaparku, pakolki jana praviała ŭ valjery ŭsio svajo žyćcio i prosta nie zmahła b vyžyć va ŭmovach, kali nichto nie budzie pra jaje kłapacicca i prynosić ježu.
«Častka našaha žyćcia»
Paśla viestki pra śmierć Mali ŭ sacyjalnych sietkach źjaviłasia mnostva dopisaŭ filipincaŭ roznych pakaleńniaŭ, jakija ŭspaminajuć, što školnyja ekskursii ŭ Maniłu zaŭsiody ŭklučali naviedvańnie zaaparka, kab pahladzieć na Mali.
Mnohija ź ich mocna pieražyvajuć, što słanicha pamierła ŭ adzinocie.
Adna karystalnica ŭzhadała, jak upieršyniu ŭbačyła Mali 11 hadoŭ tamu.
«Ubačyŭšy Mali, jakaja biaskonca chadziła pa kole, luby čałaviek adčuvaŭ, nakolki jana samotnaja. Heta raźbiła mnie serca … i voś ciapier nam skazali, što Mali pamierła»»
«Sumna z-za śmierci Mali, znakamitaj słanichi tut, na Filipinach. Spadziajusia, słanoŭ bolš nie buduć zamykać u zaaparkach», — napisaŭ inšy karystalnik sacsietki X.
«Mis Biełaruś» usio bolš nahadvaje konkurs pryhažości ŭ haremie23
Kamientary