Źmiakčyli zabaronu na pracu trenieram biez dypłoma. Raniejšyja patrabavańni akazalisia nierealistyčnymi
Ministerstva sportu i turyzmu źmianiła raniejšuju pastanovu ab prachodžańni akredytacyi dla rabotnikaŭ spartyŭnaj śfiery. Uličyli prośby i skarhi trenieraŭ, jakija z 1 studzienia 2024 hoda mahli zastacca biez pracy z-za farmalnych pryčyn, piša Tochka.by.
Pavodle raniejšych pravił, da 1 studzienia 2024 hoda rabotniki spartyŭnaj śfiery pavinny byli prajści akredytacyju. Abaviazkovaj dla hetaha ŭmovaj musiła stać najaŭnaść vyšejšaj adukacyi, jakuju mieli daloka nie ŭsie pradstaŭniki sa spartyŭnaj haliny i fitnes-śfiery.
Novaja pastanova Minsportu, jakaja ŭnosić źmieny ŭ raniej adkarektavanuju instrukcyju, apublikavanaja na Nacyjanalnym pravavym internet-partale. Ciapier fitnes-treniery i piedahohi biez vyšejšaj adukacyi zmohuć praciahnuć pracu ŭ svajoj halinie pry ŭmovie, što jany ŭžo prachodziać adpaviednuju pierapadrychtoŭku pa hrupie śpiecyjalnaściaŭ «Fizičnaja kultura i sport» (i byli pryniatyja na pracu da 1 studzienia 2024 hoda). Dakumient užo ŭstupiŭ u siłu.
Raniejšyja patrabavańni vyklikali chvalu abureńniaŭ ad pradstaŭnikoŭ fitnes-śfiery, bo tam časta pracujuć tyja, chto skončyŭ tolki roznyja kursy.
Pry hetym mnohija treniery adznačali: jany hatovyja žyć pa novych praviłach, ale im nie chapaje času, kab atrymać adukacyju i prajści akredytacyju ŭ termin. Da taho ž u instytutach pierapadrychtoŭki i pavyšeńnia kvalifikacyi prosta niama miescaŭ dla ŭsich achvotnych. Ciapier, darečy, zapisacca na takuju pierapadrychtoŭku ŭ adnu z navučalnych ustanoŭ možna tolki na vierasień 2024 hoda.
Kamientary