Jak maje pracavać schiema pa abychodžańni sankcyj, nakładzienych na vytvorcaŭ cyharet
Učora stała viadoma, što ŭ śpisie vytvorcaŭ cyharet u Biełarusi źjaviłasia novaja jurydyčnaja asoba — TAA «Sientoni PRO». Jana zarehistravanaja pa adrasie handlovaha centra «Karona» na vulicy Kalvaryjskaj u Minsku, jaki naležyć Paŭłu Tapuzidzisu, što trapiŭ pad zachodnija sankcyi. Office Life piša, jak ciapier usio heta aformlena i maje pracavać.
Pavodle dakumientaŭ, «Sientoni PRO» naležyć na 50% hramadzianinu Biełarusi Siarhieju Karpoviču i na 50% — «Stroj-Andzi» Andreja Piskarova. Statutny kapitał — 2000 rubloŭ.
Kampanija zarehistravanaja pa tym samym adrasie, što i adzin ź minskich handlovych centraŭ «Karona», jakim kiruje kampanija Paŭła Tapuzidzisa «Tytuń-Inviest».
Jak vynikaje ź pieraliku Ministerstva pa padatkach i zborach, «Sientoni PRO» budzie vyrablać cyharety marak Kent, Pall Mall, Rothmans, Vogue, Lucky Strike. Jany histaryčna naležali adnamu ź lidaraŭ hłabalnaha tytuniovaha rynku — British American Tobacco (BAT).
Pieršapačatkova ŭ Biełarusi «Brytyš-Amierykan Tabaka Trejdynh Kompani» zajmałasia dystrybucyjaj svajoj pradukcyi i kantraktnaj vytvorčaściu cyharet na hrodzienskaj tytuniovaj fabrycy «Nioman».
Paśla traplańnia apošniaj pad zachodnija sankcyi ŭ 2021 hodzie mižnarodnaja karparacyja zreahavała na heta prypynieńniem supracoŭnictva z «Niomanam». U vyniku častka vytvorčaści BAT była pieraniesiena na minskuju fabryku «Tytuń-Inviest».
U hety čas inšy staličny vytvorca tytuniovych vyrabaŭ «Inter Tabaka» Alaksieja Aleksina taksama apynuŭsia pad sankcyjami. Praz heta Philip Morris skasavaŭ licenzijnuju vytvorčaść ź biełaruskaj kampanijaj. Razam z tym u Aleksina zastalisia łakalnyja marki i sietka handlovych kropak «Tabakierka».
U vieraśni 2023 hoda British American Tobacco abviaściła ab zaklučeńni ździełki pa prodažy biznesu ŭ Rasii i Biełarusi kansorcyumu rasijskich inviestaraŭ i miascovaha mieniedžmientu «BAT Rasija». Novaja struktura paśla zakančeńnia «biznes-tranśfieru» stała nazyvacca hrupaj kampanij ITMS. Pry hetym tytuniovaja karparacyja pakinuła biznes svajmu mieniedžmientu razam z pravami na tavarnyja znaki.
U kancy minułaha hoda Ministerstva finansaŭ ZŠA ŭniesła ŭ sankcyjnyja śpisy kampaniju «Tytuń-Inviest « i jaje ŭładalnikaŭ — Paŭła Tapuzidzisa i Viktara Piatroviča. Da hetaha «Tytuń-Inviest» na praciahu mnohich hadoŭ supracoŭničaŭ z Japan Tobacco International.
Na minskaj fabrycy była naładžanaja licenzijnaja vytvorčaść Winston, Camel, Sobranie i inšych mižnarodnych brendaŭ. Ciapier na sajcie «Tytuń-Inviest» jość infarmacyja tolki ab ich ułasnych handlovych markach.
Pavodle źviestak Office Life, sankcyi zatarmazili dziejnaść JTI u Biełarusi.
«Kampanija JTI praciahvaje svaju pracu na rynku Respubliki Biełaruś. U ciapierašni čas, pa niezaležnych ad nas pryčynach, my adčuvajem časovyja składanaści z zabieśpiačeńniem poŭnaha asartymientu pradukcyi na palicach u roźničnych handlovych punktach, adnak my aktyŭna pracujem nad rašeńniem prablem, jakija ŭźnikli ŭ intaresach našych partnioraŭ i spažyŭcoŭ», havorycca ŭ paviedamleńni kampanii.
Čytajcie taksama:
U Biełarusi źjaviłasia novaja kampanija — vytvorca cyharet. Ale nie novaje proźvišča jaje ŭładalnika
Vyjavilisia svajackija suviazi pamiž ułaśnikami «Karony» Paŭłam Tapuzidzisam i Viktaram Piatrovičam
Tapuzidzis, Šaŭcoŭ, Šakucin… ZŠA ŭviali novyja sankcyi suprać fizičnych i jurydyčnych asob Biełarusi
Kamientary