Fiederalny sudździa pastanaviŭ prybrać imia Trampa z fasada Kienedzi-centra ŭ Vašynhtonie
Akruhovy sud u Vašynhtonie zabaraniŭ pierajmianoŭvać Miemaryjalny centr vykanalnickich mastactvaŭ imia Džona Kienedzi ŭ honar Donalda Trampa i pastanaviŭ prybrać jaho imia z fasada budynka, dzie jano było raźmieščana ŭ kancy minułaha hoda, piša Bi-bi-si.
Sudździa abhruntavaŭ svajo rašeńnie tym, što pierajmienavańnie ŭstanovy ŭ Vašynhtonie niemahčyma biez uchvaleńnia Kanhresa, a taksama zabaraniŭ zakryvać centr na čas zapłanavanaha ramontu.
Zhodna z pastanovaj, imia Trampa pavinna być vydalena z nazvy ŭstanovy, ź jaje fasada, a taksama ź lubych inšych fizičnych ci ličbavych šyldaŭ i aficyjnych materyjałaŭ ciaham 14 dzion.
Tramp zajaviŭ u sacyjalnaj sietcy Truth Social, što ŭ takim vypadku jon spyniaje ŭdzieł u rekanstrukcyi Kienedzi-centra i daručaje padrychtavać dakumienty, kab viarnuć «hetu pravalnuju ŭstanovu» pad apieku Kanhresa.
«Kali ja nie mahu svabodna rabić toje, što ŭ mianie atrymlivajecca lepš, čym u kaho-niebudź inšaha, — viarnuć hetuju ŭstanovu da žyćcia fizična, finansava i ŭ mastackim płanie, — ja nie zacikaŭleny praciahvać toje, što moža być tolki bieznadziejnym padarožžam u «Nietłandyju», — napisaŭ jon.
Centr mastactvaŭ imia Kienedzi— hałoŭny nacyjanalny teatralna-kancertny kompleks ZŠA, finansavańnie jakoha zabiaśpiečvaje Kanhres. U lutym 2025 hoda Donald Tramp źmianiŭ niekalkich apiekunoŭ u saviecie centra i pryznačyŭ apiekunom samoha siabie, paśla čaho byŭ abrany staršynioj hetaj kulturnaj arhanizacyi.
Paźniej Tramp abviaściŭ ab prysvajeńni ŭstanovie svajho imia. U śniežni 2025 hoda na fasadzie centra źjaviłasia novaja šylda z poŭnym imiem Trampa. Za hetymi źmienami, uklučajučy pierajmienavańnie, rušyła ŭśled admiena vystupleńniaŭ artystaŭ, jakija byli zajaŭleny na hetaj placoŭcy, a taksama padzieńnie prodažaŭ biletaŭ.
U lutym Tramp abviaściŭ pra dvuchhadovaje zakryćcio ŭstanovy dla praviadzieńnia kapitalnaha ramontu, pačatak jakoha byŭ pryznačany na 4 lipienia 2026 hoda — «ŭ honar 250‑hodździa našaj krainy».
Člen rady dyrektaraŭ Džojs Bici — demakratka i člen Kanhresa ad štata Ahajo, a taksama inšyja byłyja apiekuny asprečyli źmieny, uniesienyja Trampam, zajaviŭšy ŭ pazovie, što byli pazbaŭlenyja prava hołasu pa pytańniach, jakija razhladalisia savietam.
Paźniej pazoŭščyki ŭnieśli papraŭki ŭ pazoŭ, kab taksama asprečyć płany zakryćcia ŭstanovy na ramont.
«Siońniašniaje rašeńnie spraviadliva paćviardžaje, što sproby ciapierašniaj administracyi pierajmienavać i zakryć Centr nie majuć pad saboj nijakich pravavych padstaŭ», — zajaviła Bici.
«Kienedzi-centr — heta ŭstanova, jakaja naležyć amierykanskamu narodu, a nie Donaldu Trampu. Jon apahaniŭ hety śviaty miemaryjał dziela ŭłasnaha samalubstva. Ja hanarusia tym, što zmahałasia za viaršenstva prava i abaronu hetaj ustanovy», — dadała jana.
Aficyjnaja pradstaŭnica centra zajaviła, što arhanizacyja budzie abskardžvać pastanovu akruhovaha suda.
«My ŭpeŭnienyja, što pry razhladzie apielacyi sud padtrymaje rašeńnie savieta ab pryznańni histaryčnaha ŭkładu prezidenta Trampa ŭ kulturny centr našaj krainy», — zajaviła pres-sakratarka Kenedzi-centra Roma Daravija.
Daravi taksama adznačyła, što ŭ centry nie zhodnyja z rašeńniem ab prypynieńni ramontnych rabot, pakolki jon «maje patrebu ŭ terminovaj i maštabnaj restaŭracyi».
«Pakolki 257 miljonaŭ dołaraŭ byli vydzieleny prezidentam Trampam i ŭchvaleny Kanhresam, nieabchodnyja resursy majucca, i my pa-raniejšamu prychilnyja vykarystańniu ŭsich zakonnych mahčymaściaŭ, kab zabiaśpiečyć adnaŭleńnie Centra Trampa—Kenedzi jak nacyjanalnaj kulturnaj słavutaści, jakoj zmohuć karystacca ŭsie amierykancy», — skazała jana.
Pavodle zadumy Trampa, poŭnaja nazva ŭstanovy pavinna była hučać jak «Miemaryjalny centr vykanalnickich mastactvaŭ imia Donalda Dž. Trampa i Džona F. Kienedzi».
Zhodna z pastanovaj akruhovaha sudździ Krystafiera Kupiera, nazva budzie viernuta da raniejšaha varyjantu — «Miemaryjalny centr vykanalnickich mastactvaŭ imia Džona F. Kienedzi». Mienavita tak jon byŭ nazvany pry adkryćci ŭ 1971 hodzie ŭ pamiać pra 35‑ha prezidenta ZŠA Džona Fitcdžeralda Kienedzi, zabitaha ŭ 1963 hodzie.
«Statut Kenedzi-centra całkam vyrazna śćviardžaje, što Centr nazvany ŭ honar prezidenta Kienedzi i nie moža być pierajmienavany abo pryśviečany inšamu čałavieku na padstavie adnabakovaha rašeńnia Rady», — napisaŭ Kupier u svaim 94‑staronkavym rašeńni, pryniatym sudździoj, pryznačanym pry administracyi Abamy.
«Kanhres daŭ Kienedzi-centru jaho nazvu, i tolki Kanhres moža jaje źmianić», — havorycca ŭ dakumiencie.
Ciapier čytajuć
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ5
Kamientary