54-hadovaha eks-premjera pracaŭładkavała jaho ŭłasnaja žonka.
Paśla namioku na padtrymku ruchu za svabodnyja vybary były premjer Biełarusi Siarhiej Rumas praśliznuŭ mima turmy, ale straciŭ u hrošach i abnuliŭ svaju namienkłaturnuju vahu. Nie znajšoŭšy za čatyry hady raboty, jon pierasiedžvaje składanyja časy na farmalnaj pasadzie ŭ klinicy žonki.
Jaho miesca pracy «Naša Niva» zaŭvažyła ŭ dakumiencie rasijskaha ŭrada. Tam ukazvajecca, što asnoŭnaje miesca pracy Siarhieja Rumasa — daradca tavarystva z abmiežavanaj adkaznaściu «PrymaMied Hrup».
«PrymaMied Hrup» — heta biznes žonki byłoha kiraŭnika ŭrada, Žanny Rumas. Jana vałodaje ŭ Minsku nievialikim miedycynskim centram Proud Clinic.
Siarhiej Rumas nie maje miedycynskaj adukacyi, ale jon finansist ź vialikim dośviedam, čyim kampietencyjam vidavočna ciesnavata ŭ ścipłym siamiejnym miedcentry.
Heta pakazvaje, što inšaj raboty Rumas u Biełarusi znajści prosta nie moža.
Źviestki pra jaho žyćcio ŭ cełym abryŭkavyja.
Paśla namioku na padtrymku pratestaŭ u 2020-m jon trapiŭ u niałasku. Chadziła infarmacyja pra kryminalnuju spravu, jakaja była skiravanaja suprać jaho. Niejki čas jon pravioŭ nie ŭ Biełarusi, paśla viarnuŭsia.
Maskva dała byłomu premjeru siniekuru ŭ naziralnaj radzie rasijskaha «Raśsielhasbanka». U čarhovym rasparadžeńni rasijskaha ŭrada, źviazanym z farmiravańniem hetaj rady, my i pabačyli źviestki pra «asnoŭnuju pracu» premjera-refarmatara.
Čytajcie taksama: Stała viadoma, dzie znachodzicca Siarhiej Rumas i ŭ čym sens pretenzij da jaho
«Našaj Nivie» viadoma, što Rumas sprabavaŭ uładkavacca na pazicyi, adpaviednyja jaho kampietencyi, u Vialikabrytanii i Rasii, ale biez pośpiechu.
Znachodžańnie Rumasa ŭ naziralnaj radzie Rasijskaha sielskahaspadarčaha banka nie varta ŭsprymać jak nadziejnuju krynicu prybytka.
Siabry naziralnaj rady ŭ teoryi paklikany praviarać dziejnaść kiraŭnikoŭ arhanizacyi ŭ intaresach akcyjanieraŭ, analizavać i davać rekamiendacyi, jak hetuju dziejnaść palepšyć.
Stavak apłaty na takoj pasadzie nie vyznačana, i hrošy, jak praviła, atrymlivajuć tyja, u kaho lepšyja adnosiny z akcyjanierami — u dadzienym vypadku z rasijskaj dziaržavaj.
Siarhiej Rumas — samaja značnaja fihura, jakaja akazałasia za miažoj i ŭ niałascy ŭ razhar supraćstajańnia Alaksandra Łukašenki ź biełaruskim hramadstvam. Ale da apazicyi Rumas nie dałučyŭsia. Jamu ŭdałosia damovicca, viarnucca na radzimu i zachavać svabodu. Ale ŭ sistemu jon dahetul nie reintehravaŭsia.
Ciapier čytajuć
Łukašenka sprabavaŭ vyśvietlić, chto nastukaŭ Pucinu pra hieorhijeŭskija stužki12
Kamientary
prykidvaju, što było b z majoj lubimaj Biełarusiečkaj, atrymaj Pał Pałyč pOrtfiel premjera, jaki jon tak chacieŭ...