U Vieniesuele adzinym kandydatam ad apazicyi staŭ niemałady dypłamat, jaki byŭ pasłom u časy Čaviesa

Abjadnanaja demakratyčnaja płatforma, jakaja abjadnoŭvaje asnoŭnuju častku apazicyi Vieniesueły, paśla piacihadzinnaj sustrečy nazvała imia adzinaha kandydata na prezidenckich vybarach, što adbuducca ŭ kancy lipienia. Im staŭ prafiesijny dypłamat Edmunda Hansales Urutya (Edmundo González Urrutia).

Jon naradziŭsia ŭ 1949 hodzie, zakončyŭ fakultet mižnarodnych daśledavańniaŭ Centralnaha ŭniviersiteta Vieniesueły, z 1978 znachodziŭsia na dypłamatyčnaj rabocie ŭ ZŠA, dzie ŭ 1981 hodzie atrymaŭ stupień mahistra mižnarodnych adnosin.

Hansales Urutya zajmaŭ roznyja pasady ŭ hałoŭnym upraŭleńni mižnarodnaj palityki Ministerstva zamiežnych spraŭ Vieniesueły ŭ pieryjad z 1994 pa 1998 hod, uklučajučy kiraŭnictva kamitetam stratehičnaha analizu i płanavańnia.

Akramia hetaha, jon byŭ pasłom Vieniesueły ŭ Ałžyry (1991—1993 hady) i Arhiencinie (1998-2002 hady). Z dypłamatyčnaj słužby adyšoŭ u 2002 hodzie i zaniaŭsia navukovaj karjeraj. Ciapier Hansales Urutya źjaŭlajecca namieśnikam dyrektara i kaardynataram Pracoŭnaj hrupy pa mižnarodnym sistemnym manitorynhu Instytuta parłamienckich daśledavańniaŭ.

U pieryjad z 2013 pa 2015 hod Hansales byŭ mižnarodnym pradstaŭnikom Kruhłaha stała demakratyčnaha adzinstva — šyrokaj vybarčaj kaalicyi apazicyi, a ŭ 2020-ch staŭ jaho prezidentam.

Abviaščeńnie adzinaj kandydatury było zroblena pa vynikach sustrečy Edmunda Hansalesa z Maryjaj Mačada, jakaja pieramahła na apazicyjnych prajmieryz, ale nie dapuščanaja da vybaraŭ uładami. Rašeńniem Viarchoŭnaha suda Vieniesueły jaje pazbavili na 15 hadoŭ prava zajmać dziaržaŭnyja pasady.

Praz adsutnaść prahresu ŭ pieramovach pamiž uradam i apazicyjaj ZŠA ŭ kancy studzienia 2024 hoda adnavili dziejańnie sankcyj u dačynieńni da naftahazavaha siektara Vieniesueły.

Hansales byŭ niečakana zarehistravany kandydatam ad Demakratyčnaj unitarnaj płatfomy ŭ dadatkovy dzień rehistracyi kandydataŭ 26 sakavika, paśla niaŭdałaj sproby apazicyi zarehistravać inšaha kandydata. 

Vybary prezidenta Vieniesueły adbuducca 28 lipienia. Dla ŭdziełu ŭ ich zarehistravany 13 kandydataŭ. Edmunda Hansales Urutya, jaki padčas rehistracyi razhladaŭsia jak techničny kandydat, staŭ klučavoj fihuraj u namahańniach tradycyjnaj apazicyi pa kansalidacyi ahulnaha frontu ŭ baraćbie za prezidenckaje kresła suprać dziejnaha prezidenta Nikałasa Madury. Da hetaha apazicyja bajkatavała prezidenckija vybary 2018 hoda i parłamienckija 2020-ha.

• 3
• 0
• 3
• 1
• 2
• 0
• 0
• 0