Pa infarmacyi vydańnia The Times, 4 maja 2024 hoda kałonu z čornaj Toyota Land Cruiser pavinny byli spynić rakietnym udaram, a zatym zabić usich. Heta byŭ by padarunak Pucinu da 9 maja.
Brytanskaja The Times dzielicca detalami sarvanaha zamachu na kiraŭnika HUR Kiryłu Budanava, a taksama daŭnim płanam rasijan uziać u zakładniki prezidenta Uładzimira Zialenskaha, kab jon abviaściŭ ab kapitulacyi.
Jak paviedamlajecca, u pačatku maja 2024 hoda SBU vykryła ahientaŭ, jakija rychtavali zamach na prezidenta Uładzimira Zialenskaha, kiraŭnika SBU Vasila Maluka i kiraŭnika HUR Kiryłu Budanava. U pryvatnaści, apošniaha płanavali zabić 4 maja padčas skaardynavanaj rakietna-bieśpiłotnaj ataki.
Zamach na Budanava
Pa infarmacyi vydańnia, kiler abstalavaŭ u adnym z padvałaŭ u Kijeŭskaj vobłaści centr kiravańnia dronami. «Kali ŭbačycie kałonu z čornaj Toyota Land Cruiser i čornym mikraaŭtobusam, paviedamicie kaardynaty», — cytuje The Times dadzieny jamu zahad.
«Rasijanie płanavali zapuścić balistyčnuju rakietu pa hetych kaardynatach. Paśla hetaha kaardynatar pavinien byŭ zapuścić dron, źniać nastupstvy ataki i zakidać hranatami luboha, chto vyžyŭ abo pryjšoŭ na dapamohu», — pieradaje vydańnie słovy vysokapastaŭlenaha aficera HUR.
Praz 20 chvilin rasijanie pavinny byli nanieści ŭdar druhoj balistyčnaj rakietaj, kab źniščyć ekstrannyja słužby i schavać detali napadu z FPV-drona.
Chto zmoŭščyk
Jak paviedamlajecca, raspracoŭščyki płanu zamachu — dva pałkoŭniki Upraŭleńnia dziaržaŭnaj achovy, jakija achoŭvajuć vyšejšych ukrainskich čynoŭnikaŭ, u pryvatnaści, prezidenta. Za imi SBU sačyła na praciahu dvuch miesiacaŭ. Akramia hetaha, pad nazirańniem była treciaja asoba — nienazvany patencyjny zabojca. Usiaho atrymałasia vyjavić piać rasijskich ahientaŭ.
Padčas padrychtoŭki da zamachu padazravanyja pryvieźli ŭ Kijeŭ hranatamioty, supraćpiachotnuju minu i FPV-drony.
Vydańnie nazyvaje imiony padazravanych. Adzin ź ich — pałkoŭnik Andrej Huk, jaki naradziŭsia ŭ Rasii. Jaho abvinavačvajuć u pracy na FSB z 2014 hoda. Jon nibyta zavierbavaŭ pałkoŭnika Alaksandra Dziarkača.
Padčas dopytaŭ Huk raskazaŭ, što atrymlivaŭ ad FSB $3000 na miesiac i jašče $1000 na pajezdki dla vykanańnia daručeńniaŭ. Značnuju častku hrošaj jamu vypłačvali padčas vizitaŭ u Jeŭropu.
Druhi aficer, Dziarkač, śćviardžaje, što prymaŭ udzieł u zmovie dziela hrošaj i spadziavaŭsia, što staršy pa zvańni Huk dapamoža jaho karjernym pierśpiektyvam.
Zatrymańnie
Pieramovy pamiž zabojcam i kuratarami byli pierachoplenyja SBU. Maluk nieadkładna paviedamiŭ Budanavu. Zabojcaŭ aryštavała ŭzbrojenaja hrupa reahavańnia, a SBU padrychtavała apieracyju pa aryšcie saŭdzielnikaŭ.
Adzin pałkoŭnik byŭ doma, u kijeŭskaj kvatery. Inšy — u haściach u siabroŭ u Sumskoj vobłaści. Abodva mieli pry sabie zbroju. Kab paźbiehnuć pierastrełki, SBU vymaniła ich pad vyhladam niečakanych vyklikaŭ na pracu. Jany byli zatrymanyja na adnym z ustanoŭlenych błokpastoŭ.
Padčas pieratrusaŭ u kvaterach padazravanych znajšli vybuchoŭku, kampanienty dronaŭ, tajniki z sakretnym telefonam. U im byli zapisy, jakija identyfikujuć transpartnyja srodki i maršruty, pa jakich pierasoŭvalisia Zialenski i Maluk, a taksama paviedamleńni ab ich pieramiaščeńni.
Jak Rasija chacieła ŭziać Zialenskaha ŭ zakładniki
Apynuŭšysia pad aryštam, pałkoŭniki taksama raspaviali novuju infarmacyju ab sprobie Rasii ŭziać Zialenskaha ŭ zakładniki ŭ samym pačatku vajny.
«U lutym 2022 hoda ahient numar adzin atrymaŭ zadaču vyjavić inšych aficeraŭ dziaržaŭnaj achovy, łajalnych Rasii, i zabić tych, chto łajalny Ukrainie, kab uziać prezidenta ŭ zakładniki. Jany pavinny byli prymusić Zialenskaha zrabić videazvarot z kapitulacyjaj i zajavić, što niama pryčyn zmahacca – inakš jaho zabjuć», — cytuje vydańnie słovy aficera HUR.
U chaosie pieršych dzion pałkoŭnik zajšoŭ nastolki daloka, što sabraŭ achoŭnikaŭ prezidenta i prapanavaŭ im skłaści zbroju:
«My nie armija, u nas niama zadačy abaraniać Ukrainu i mnie nie płaciać dastatkova, kab tut učynić Bresckuju krepaść».
Pa słovach supracoŭnika SBU, jaho kalehi pa achovie ŭspryniali hetyja kamientary jak emacyjnuju reakcyju na ŭvarvańnie i praihnaravali ich. Pakolki zhadany aficer byŭ starejšy pa zvańni, jany nie stali jamu piarečyć. Užo paśla jaho aryštu, kali stała zrazumieła, što aficer dziejničaŭ pa zahadzie FSB, jany byli šakavanyja.
Jak paviedamlajecca, u vypadku dokazu viny padazravanym pahražaje pažyćciovaje pazbaŭleńnie voli.
Ciapier čytajuć
U Asipovičach imkliva razbudoŭvajuć infrastrukturu. Imavierna, dla rasijskaj jadziernaj zbroi6
Kamientary