Šef-kuchar. Što viadoma pra rasijanina, aryštavanaha ŭ Francyi za padrychtoŭku čahości žachlivaha padčas Alimpijady

Aŭtarytetnaje francuzskaje vydańnie Le Monde apublikavała cikavyja fakty pra 40-hadovaha hramadzianina Rasii, jakoha zatrymali ŭ Paryžy napiaredadni Alimpijady.

Vydańnie śćviardžaje, što mužčyna (jaho nazyvajuć K.) — supracoŭnik rasijskich śpiecsłužbaŭ. 21 lipienia K. aryštavali ŭ jahonaj paryžskaj kvatery. Jamu vystaŭlenaje abvinavačańnie ŭ padrychtoŭcy «aktaŭ destabilizacyi».

23 lipienia zaviali kryminalnuju spravu pa fakcie «pracy na zamiežnuju raźviedku z metaj pravakavańnia varožaści ŭ Francyi». Za ździajśnieńnie takoha pahražaje da 30 hadoŭ źniavoleńnia. U toj ža dzień K. vystavili abvinavačańnie, jaho źmiaścili ŭ śledčy izalatar.

Lie Monde adšukała reziume K. U im śćviardžałasia, što mužčyna spačatku byŭ partnioram u adnym z maskoŭskich inviestfondaŭ, a potym pracavaŭ u inšych finansavych kampanijach.

U pačatku 2010 hoda K. pierajazdžaje ŭ Francyju i niečakana mianiaje kirunak dziejnaści. Jon skončvaje paryžskuju kulinarnuju škołu i ŭ listapadzie 2011 hoda pierajazdžaje ŭ Kuršavel, dzie da sakavika 2012 hoda stažyrujecca ŭ hateli ź mišlenaŭskim restaranam.

Paśla hetaha mužčyna nabyvaje viadomaść jak udzielnik niekalkich realici i kulinarnych šou na rasijskim TV. Jon śćviardžaje, što pracuje «pryvatnym šef-kucharam», i raźmiaščaje kulinarnyja roliki ŭ sacyjalnych sietkach. Tam u jaho było niekalki tysiač padpisčykaŭ.

U toj ža čas isnavaŭ elektronny list, jaki K. 9 vieraśnia 2012 hoda napisaŭ uładalnicy kvatery, jakuju jon zdymaŭ. U im małady čałaviek paviedamlaje, što viarnuŭsia ŭ Maskvu pracavać u rasijskim uradzie. Ale, jak zaŭvažaje vydańnie, pra hetuju pracu ŭ reziume K. nie zhadvajecca.

U krasaviku hetaha hoda K. vyklikali ŭ Francyju na dzień hramadzianskaha navučańnia — adzin z abaviazkovych etapaŭ intehracyi imihrantaŭ va Francyi.

8 maja K. mieŭ vylecieć z Stambuła ŭ Paryž (z Maskvy ŭ Jeŭropu samaloty nie lotajuć), ale pierapiŭ i jaho nie puścili na bort. Tady jon pajechaŭ u Bałharyju, kab vylecieć adtul.

Jak piša Le Monde, pa darozie K. patelefanavaŭ svajmu šefu ŭ rasijskaj śpiecsłužbie. U čas razmovy jon, siarod inšaha, zajaviŭ, što «francuzy źbirajucca zababachać takuju cyrymoniju adkryćcia, jakoj jašče nie byvała».

Supracoŭniki Hałoŭnaha ŭpraŭleńnia ŭnutranaj biaśpieki (francuzskaja kontrvyviedka) sakretna abšukali kvateru K. I znajšli tam «dakumienty, jakija vyklikajuć zakłapočanaść z nahody jaho namieru arhanizavać mierapryjemstvy, jakija zmohuć pryvieści da destabilizacyi ŭ čas Alimpijskich hulniaŭ».

Ułady nie paviedamlajuć nijakich padrabiaznaściej ab tym, što płanavaŭ K. Tolki adznačajuć, što heta nie maje dačynieńnia da teraryzmu.

Vydańnie adznačaje, što napiaredadni Alimpijady było praviedziena bolš za miljon administracyjnych pravierak absłuhoŭvajučaha piersanału.

Ministr unutranych spraŭ Francyi Žerald Darmanen (Gérald Darmanin) zajaviŭ 23 lipienia ŭ intervju Paris Match, što 4360 čałaviek nie atrymali dopusku pracavać na Alimpijadzie.

Infarmacyjnaje ahienctva AFP u niadzielu paviedamiła ab adchileńni jašče 880 čałaviek z-za padazreńnia ŭ zamiežnym umiašańni (špijanažy, kibieratakach i inšym).

• 13
• 1
• 2
• 0
• 3
• 0
• 0
• 0