Samy pieršy zamiežny samalot «Biełavija» byŭ pradadzieny Iranu amal try hady tamu. Ale paćvierdziłasia heta tolki zaraz
Jašče ŭ listapadzie 2021 hoda stała viadoma, što avijakampanija «Biełavija» z aŭkcyjonu pradała svoj samy pieršy impartny samalot — Boeing 737-500 z rehistracyjnym numaram EW-250PA, jaki lotaŭ na rejsach avijakampanii cełych 17 hadoŭ, piša Motolkohelp.
Tady samalot byŭ pradadzieny za $1,2 młn, ale chto mienavita jaho nabyŭ — nie paviedamlałasia.
Pa skančeńni amal 3-ch hadoŭ atrymałasia vyśvietlić i całkam paćvierdzić, što ŭ listapadzie 2021 h. EW-250PA byŭ napramuju pradadzieny padsankcyjnaj iranskaj avijakampanii Caspian Airlines, a litaralna na minułym tydni jon byŭ aficyjna pradstaŭleny ŭ iranskich ŚMI, i pačaŭ lotać pad novym numaram i ŭ novaj liŭrei.
U skład łota taksama ŭvachodziła dapamožnaja siłavaja ŭstanoŭka Model GTCP85-129h i dva ruchaviki CFM56-3c1, a pradaviec adznačaŭ, što pracazdolnaść DVS, vuzłoŭ i ahrehataŭ nie praviarałasia, i što pry instrumientalnym kantroli, dyjahnostycy i razborcy mahčyma vyjaŭleńnie schavanych defiektaŭ.
Aŭkcyjon pa prodažy samalota adbyŭsia 8 listapada 2021 h. i byŭ zavieršany ŭsiaho za 12 chvilin pieramohaj adzinaha ŭdzielnika, jaki nabyŭ jaho za amal 3,1 młn. rubloŭ ($1.264 młn). Imia pakupnika nie nazyvałasia.
Z momantu prodažu ŭ 2021 hodzie z samalotam naohuł ničoha nie adbyvałasia. Nastupnyja 16 miesiacaŭ jon prastajaŭ na parkoŭcy Nacyjanalnaha aeraporta «Minsk», ale ŭsio źmianiłasia 26 sakavika 2023 hoda. U toj dzień bort atrymaŭ novy rehistracyjny numar — EP-CPF, jaki staŭ śviedčyć ab prynaležnaści da iranskaj avijakampanii Caspian Airlines.
26 sakavika ŭ 15:11 samalot uźlacieŭ z Nacyjanalnaha aeraporta «Minsk».
Jon pryziamliŭsia ŭ Iranie 26 sakavika 2023 hoda ŭ 19:48 pavodle mienskaha času ŭ aeraporcie dla ŭnutranych rejsaŭ VPS Irana i ŭradavych bartoŭ hetaj krainy — Tehran Mehrabad.
21 žniŭnia 2024 hoda samalot atrymlivaje novy rehistracyjny numar — EP-KPC, jaki znoŭ pakazvaje na prynaležnaść da iranskaj avijakampanii Caspian Airlines.
Na nastupny dzień u iranskich ŚMI vychodzić navina ab tym, što praz 18 miesiacaŭ paśla prybyćcia ŭ krainu, «Kaśpijskija avijalinii» ŭvodziać u stroj Boeing B737-500 (reh. numar EP-KPC) i publikujuć pieršuju fatahrafiju samalota ŭ novaj liŭrei.
-
Pamiatajecie stvaralnika adyjoznaha sajta «Litkrytyka», jaki byŭ palitviaźniem? Zdajecca, jaho aryštavali znoŭ
-
Dla biblijateki imia Karatkieviča ŭ Rahačovie zakuplajuć tysiačy knih, ale nivodnaj na biełaruskaj movie
-
Za minuły hod kolkaść ekanamičnych złačynstvaŭ u Biełarusi vyrasła amal na 20 pracentaŭ
Kamientary