U Biełaruś za noč zalacieli nie mienš za vosiem šachiedaŭ. Adzin ź ich źbiła SPA Rasii
Z vaśmi šachiedaŭ, jakija zalacieli ŭ Biełaruś unačy, jak minimum dva byli źbityja, nahadvaje Biełaruski Hajun.
Minułaj nočču ŭ pavietranuju prastoru Biełarusi pranikli minimum vosiem šachiedaŭ. Pieršaja hrupa z dvuch dronaŭ pierasiekła miažu ź Biełaruśsiu kala 01:08 i ruchałasia kursam na Homiel. U 01:34 i 01:36 nočy pa šachiedach pačała pracavać SPA Rasii, źbiŭšy jak minimum adzin ź ich — žychary Homiela čuli vybuchi i bačyli ŭ niebie pałajučy šachied.
Ab pracy rasijskaj SPA ŭnačy pisali i aficyjnyja resursy. Vierahodna, pa šachiedach pracavała padraździaleńnie 1530-ha zienitnaha rakietnaha pałka US RF (v/č 31458, na ŭzbrajeńni — ZRK S-400, ZRPK «Pancyr«), jakoje dysłakujecca na aeradromie «Ziabraŭka» ŭ Homielskim rajonie.
Viadoma, što šachied upaŭ na cahlany budynak składa ŭ Homieli pa 8-m zavułku Iljiča, u vyniku čaho skład zahareŭsia.
«U vyniku padzieńnia mierkavana źbitaha bieśpiłotnaha latalnaha aparata adbyłosia zaharańnie cahlanaha budynka składa ŭ Homieli pa 8-m zavułku Iljiča. Padraździaleńni MNS likvidavali pažar. Nichto nie paciarpieŭ. Ahniom paškodžana 5 kv. mietraŭ dachu», — havorycca ŭ paviedamleńni Ministerstva pa nadzvyčajnych situacyjach. Adnak, miarkujučy pa fotach, płošča paškodžanaha dachu našmat bolšaja.
Padčas pracy SPA ŭ Homieli nie ŭklučali siren pavietranaj tryvohi.
U dalejšym šachiedy praciahnuli zachodzić u pavietranuju prastoru Biełarusi: U 02:28, 03:10, 06:47, 06:56 i 07:54. Častka šachiedaŭ pieramiaściłasia nad terytoryju Ukrainy, inšyja ž sychodzili ŭhłyb Biełarusi kursami na Mazyr, Chojniki i Brahin.
Na praciahu ŭsioj nočy ŭ niebie nad Homielskaj vobłaściu lotali źniščalniki VPS RB z Baranavičaŭ i zapuskali rakiety, sprabujučy źbić šachiedy. Kala 02:30 nad Chojnickim rajonam byli čuvać niekalki zapuskaŭ rakiet i vidać trapleńnie ŭ šachied.
Z vaśmi šachiedaŭ, jakija zalacieli ŭ Biełaruś nočču 5 vieraśnia, 2 šachiedy było źbita (nad Homielskim i Chojnickim rajonami), astatnija šeść pakinuli terytoryju Biełarusi i/abo prapali bieź viestak.
Rasijskija siły SPA, imavierna, upieršyniu pracavali pa svaich bieśpiłotnikach u biełaruskim niebie. Akramia taho, adzin bieśpiłotnik spravakavaŭ razbureńni na ziamli na terytoryi Biełarusi.
Ciapier čytajuć
Jak žyvie Aleś Muchin, viadomy znaŭca «Što? Dzie? Kali?»11
Kamientary
Ŭ druhim , jakaja havorka moža iści ab
" vysokadakładnym rasiejskim ŭzbrajeńni " . " My nia źniščajem cyvilnaha nasielnictva " ? Vy navat pa Ukrainie pacelić nia zdolny .
Ad Red. Imavierna, heta vynik uździejańnia srodkaŭ REB, čytajcie ŭ našym artykule pra raniejšyja takija vypadki.