Navukoŭcy vyznačyli miažu mahčymaściaŭ achałodžvańnia čałaviečaha cieła
Pot dazvalaje čałavieku vytrymlivać śpiakotu, jakaja biez hetaha miechanizmu była b dla jaho śmiarotna niebiaśpiečnaj. Ale navat hetaja nadzvyčaj efiektyŭnaja sistema maje svaju miažu.
Kali čałavieku horača, arhanizm vydzialaje pot. Vyparajučysia sa skury, vada zabiraje z saboj ciapło i tempieratura cieła źnižajecca. Čym lepš ruchajecca pavietra, tym chutčej adbyvajecca vypareńnie i tym bolš efiektyŭna my achałodžvajemsia.
Hety miechanizm nastolki dziejsny, što dazvalaje čałavieku peŭny čas vytrymlivać tempieraturu pavietra, značna vyšejšuju za tempieraturu jaho ŭłasnaha cieła.
Adnak, jak piša Medical Express, daśledčyki z Univiersiteta štata Aryzona vyjavili situacyju, kali miechanizm achałodžvańnia pačynaje davać zboj. Prablema ŭ tym, što jaho efiektyŭnaść zaležyć nie tolki ad tempieratury i vilhotnaści pavietra, ale i ad taho, jak jano ruchajecca niepasredna kala pavierchni skury.
Što adbyvajecca kala našaj skury
Kali pavietra haračejšaje za skuru, jaho tonki słoj niepasredna kala cieła krychu achałodžvajecca. Jon stanovicca bolš ščylnym i imkniecca apuścicca ŭniz.
Adnačasova adbyvajecca supraćlehły praces. Pot vyparajecca, pavietra kala skury nasyčajecca vadzianoj paraj, stanovicca lahčejšym i imkniecca padniacca ŭvierch.
Tak kala čałaviečaha cieła ŭźnikajuć dva supraćlehłyja pavietranyja patoki. Zvyčajna my ich navat nie zaŭvažajem. Ale pry mocnaj śpiocy, suchim pavietry i poŭnaj adsutnaści vietru jany mohuć amal całkam kampiensavać adzin adnaho. Naturalny ruch pavietra kala skury rezka słabieje. A heta, u svaju čarhu, pieraškadžaje vypareńniu potu.
Ekśpierymienty pakazali, nakolki značnym moža być hety efiekt. Pry tempieratury 41°C i vilhotnaści 10% vypareńnie potu moža źnižacca na 56%. U vyniku arhanizm nazapašvaje bolš ciapła, a tempieratura skury i cieła padymajecca macniej, čym pradkazvajuć tradycyjnyja madeli ciepłavoha bałansu čałavieka.
Dla ekśpierymientaŭ daśledčyki vykarystoŭvali ANDI — śpiecyjalny maniekien z datčykami, zdolny imitavać pacieńnie. Navukoŭcy taksama stvaryli jaho kampjutarnuju madel i praviali kala sta simulacyj pry roznych umovach.
Vyniki pakazali, što, kali nie ŭličvać ruch vilhotnaha pavietra kala skury, možna istotna niedaacanić pierahreŭ arhanizma.
Pavodle raźlikaŭ, paśla dźviuch hadzin znachodžańnia ŭ haračym suchim pavietry bieź vietru tempieratura cieła čałavieka moža być prykładna na adzin hradus Celsija vyšejšaj, čym pradkazvajuć tradycyjnyja madeli ciepłavoha bałansu čałavieka.
Čamu heta važna
Bolš dakładnaje razumieńnie taho, jak arhanizm achałodžvajecca, patrebnaje najpierš dla acenki ryzyki pierahrevu. Na takich raźlikach hruntujucca rekamiendacyi dla ludziej, jakija pracujuć va ŭmovach mocnaj śpioki, a taksama raspracoŭka sistem achałodžvańnia dla ratavalnikaŭ, vajskoŭcaŭ i spartsmienaŭ.
Asabliva važnym adkryćcio moža być dla zakrytych i častkova zakrytych prastoraŭ, dzie amal niama ruchu pavietra: namiotaŭ, vytvorčych placovak, niedabudavanych budynkaŭ. Jak pakazała daśledavańnie, suchoje pavietra samo pa sabie jašče nie harantuje, što pot budzie efiektyŭna achałodžvać čałavieka.
Kamientary