Ministr sportu Kavalčuk panarakaŭ, što bieź biełarusaŭ i rasijan u suśvietnym sporcie źnikła kankurencyja. Ale heta kazki dla niedaśviedčanych

U jakaści prykładu Kavalčuk čamuści vyrašyŭ abrać łyžnyja honki, nazvaŭšy Kubak śvietu pa ich bieź biełaruskich i rasijskich spartsmienaŭ čempijanatami Narviehii i Šviecyi.

Prykład dla nibyta biełaruskaha ministra sam pa sabie dziŭny, pakolki biełarusy akurat u hetym vidzie sportu nikoli ŭ historyi vystupleńniaŭ asobnaj kamandaj asablivych zorak ź nieba nie chapali. Ale ŭ toj ža čas łyžnyja kamandy z Rasii, jak žanočaja, tak i mužčynskaja, pa słovach Kavalčuka, źjaŭlajucca adnymi z najmacniejšych u śviecie, i bieź ich, maŭlaŭ, usio ŭžo nie toje, kankurencyja na mižnarodnaj arenie adčuvalna źniziłasia.

«Chto siońnia moža skłaści kankurencyju ŭ mužčynskich łyžnych honkach narviežskim spartsmienam? Nichto. Chto siońnia moža skłaści kankurencyju šviedskim spartsmienkam? Nichto. Kubak śvietu pa łyžnych honkach u mužčyn pieratvaryŭsia ŭ čempijanat Narviehii, a ŭ žančyn u čempijanat Šviecyi», — kanstatavaŭ Kavalčuk.

Ale heta kazki dla tych, chto ŭvohule nie ŭ temie. Kali kazać pra ciapierašniaje daminavańnie narviežcaŭ i šviedak u łyžnych honkach, to nibyta tak i jość, jak kaža Kavalčuk. Naprykład, na apošnim čempijanacie śvietu ŭ 2023 hodzie ŭ słavienskaj Płanicy, jaki prachodziŭ biez rasijan i biełarusaŭ, narviežskija łyžniki zavajavali ŭsie 6 załatych miedaloŭ, jakija na im razyhryvalisia, uziaŭšy taksama 4 srebranyja i 2 bronzavyja. Šviedki, u svaju čarhu, zdabyli ŭ žanočych spabornictvam 4 zołata, 3 srebra i 4 bronzy. 

Ale ci vyklikana takoje daminavańnie vyklučna vynikam adchileńnia rasijan? Nie, tut łukašenkaŭski ministr nachabna chłusić. Kab heta zrazumieć, nie treba pravodzić hruntoŭnych daśledavańniaŭ, dastatkova tolki pahladzieć na vyniki papiarednich čempijanataŭ śvietu, jakija pravodziacca ŭ łyžnych honkach raz na dva hady. 

U davajennym 2021 hodzie rasijanie jašče ad spabornictvaŭ nie byli adchilenyja, choć i vystupali nie pad nacyjanalnym ściaham, a pad ściaham Alimpijskaha kamiteta Rasii. Ale pry hetym ahulnyja vyniki taho čempijanatu nie našmat adroźnivalisia ad tych, jakija byli ŭ 2023-m biez rasijan.

Na tych spabornictvach u niamieckim Obierstdorfie narviežskija łyžniki zdabyli chaj nie ŭsie 6, ale 5 załatych miedaloŭ, dadaŭšy da ich 3 srebra i 4 bronzy.

Rasijski ž ułoŭ byŭ usiaho čatyry miedali (1+2+1), dy i toje dziakujučy faktyčna adnamu spartsmienu Alaksandru Balšunovu, jaki ŭziaŭ dźvie ŭznaharody indyvidualna, a jašče da dźviuch spryčyniŭsia. Što da žanočych spabornictvaŭ, to tam 4 zołata było ŭ narviežak, 2 — u šviedak, a ŭ rasijanak — usiaho 1 (adzin) srebrany miedal u estafiecie. 

Toje ž było ŭ 2019 hodzie ŭ aŭstryjskim Ziefieldzie, dzie Rasija vystupała paŭnavartasna, navat pad nacyjanalnym ściaham. Usie 6 załatych mužčynskich miedaloŭ tam byli narviežskija, a ŭ žanočych spabornictvach tyja ž 4 zołata zdabyli narviežki i tyja ž 2 — šviedki.

Rasijskaja zdabyča ŭ mužčynskich spabornictvach była tam 5 srebranych miedaloŭ i 1 bronzavy. Prytym znoŭ taki hety vynik byŭ dasiahnuty pieradusim namahańniami taho ž Alaksandra Balšunova, jaki, darečy, padtrymaŭ vajnu va Ukrainie publična, to-bok u jahonym piersanalnym vypadku havorki pra «sport pa-za palitykaj» nie viadziecca havorki navat tearetyčna. Rasijanki ž na tym čempijanacie zadavolilisia ŭsiaho dźviuma bronzami.

Padobnaja karcina, chaj i z peŭnymi niuansami, była i na suśvietnych pieršynstvach 2013, 2015, 2017 hadoŭ. Daminavańnie pieradusim narviežskich spartsmienaŭ u łyžnych honkach, takim čynam, skłałasia nie siońnia, i tłumačyć jaho vyklučna ci pieradusim adchileńniem ad spabornictvaŭ rasijan, nie kažučy pra biełarusaŭ — vialikaja i cyničnaja, bo całkam śviadomaja, manipulacyja.

Časy rasijskaha daminavańnia ŭ łyžnych honkach sapraŭdy kaliści byli, ale jany daŭno praminuli. Prytym strata raniejšych pazicyj, što taksama niemałavažna, supravadžałasia hučnymi dopinhavymi skandałami. Vidavočny ŭdzieł u hetym rasijskaj dziaržavy staŭ pryčynaj taho, čamu spartsmienaŭ z Rasii stali abmiažoŭvać jašče da raźviazvańnia vajny z Ukrainaj. Ale heta ŭžo inšaja historyja. 

• 2
• 0
• 0
• 0
• 0
• 0
• 0
• 0