Źnikłaha ministra zamiežnych spraŭ Kitaja pakinuli ŭ žyvych?

Ministr zamiežnych spraŭ Kitaja Cyń Han niečakana źnik paśla taho, jak 25 červienia 2023 hoda pravioŭ sustrečy ŭ Piekinie ź ministrami zamiežnych spraŭ Šry-Łanki i Vjetnama, a taksama z namieśnikam ministra zamiežnych spraŭ Rasii Andrejem Rudenkam.

Jak piša The Washington Post, Cyń Han zrabiŭ imklivuju karjeru. Razam pryznačeńniem ministram zamiežnych spraŭ jon byŭ uviedzieny ŭ skład Dziaržaŭnaj rady. Papiarednik Hana na pasadzie zmoh tudy trapić tolki praź piać hadoŭ kiravańnia MZS.

Cyń zasłužyŭ davier Si Czińpina ŭ jakaści kiraŭnika słužby pratakołu MZS u 2014—2017 hadach. U hetaj roli jon adkazvaŭ za drabniutkija detali imidžu Si.

Vydańnie spasyłajecca na ŭspaminy byłoha biełaruskaha dypłamata Paŭła Śluńkina, jaki pisaŭ ab tym, što padčas vizitu kiraŭnika Kitaja ŭ Minsk u 2015 hodzie vymušany byŭ a druhoj hadzinie nočy pabudzić namieśnika dyrektara Muzieja historyi Vialikaj Ajčynnaj vajny, kab jon puściŭ tudy kitajskich dypłamataŭ. Padymajučysia pa stupieńkach, jany ličyli ich i cikavilisia, na jakuju ź ich stupić nahoj Si, kali zahučyć uračystaja muzyka.

Cyń byŭ pryznačany namieśnikam ministra zamiežnych spraŭ u 2018 hodzie, a potym pasłom u Złučanych Štatach u 2021 hodzie. Na hetaj pasadzie jon prabyŭ 18 miesiacaŭ i viarnuŭsia ŭ Piekin i staŭ samym maładym ministram zamiežnych spraŭ Kitaja z 1950-ch hadoŭ. Adnak praz paru miesiacaŭ paśla taho jon źnik z pola zroku.

Da siońnia dakładna nieviadoma, što pryviało da źniknieńnia Cynia. Najbolš raspaŭsiudžanaj była historyi pra jaho raman z reparciorkaj kitajskaj telekampanii Fu Siaociań, ad jakoj u jaho nibyta naradziŭsia syn, jaki staŭ hramadzianinam ZŠA. Chadzili pahałoski, što Piekin padazraje žančynu ŭ pieradačy sakretnych źviestak zamiežnaj raźviedcy, jakija tak i nie paćvierdzilisia. Adnak Fu, jak i Cyń, užo bolš za hod adsutničajuć u hramadskim žyćci krainy.

U lipieni źjaviłasia paviedamleńnie ab tym, što Cyń «vyjšaŭ» sa składu Centralnaha kamiteta Kamunistyčnaj partyi Kitaja. Na fonie infarmacyi ab zvalnieńni niekalkich čynoŭnikaŭ z składu CK, takaja traktoŭka dała padstavy dumać, što eks-ministr žyvy i moža być pryznačany na inšuju, nižejšuju pasadu.

Ciapier, jak śćviardžajuć dvoje byłych amierykanskich čynoŭnikaŭ na ŭmovach ananimnaści, Cyń Han pracuje (pa mienšaj miery, ličycca) u vydavieckim domie World Affairs Press, jaki źviazany ź Ministerstvam zamiežnych spraŭ Kitaja.

Panižeńnie ŭ pasadzie, pa słovach krynic vydańnia, «heta niałaska», ale taksama i aznačaje, što Cyń «vykruciŭsia». «Jaho nie pasadziać, ale jaho karjery kranty», — prakamientavaŭ vydańniu adzin z byłych amierykanskich čynoŭnikaŭ.

Adnak žurnalistam tak i nie ŭdałosia paćvierdzić hetuju infarmacyju ni ŭ samim vydaviectvie, ni ŭ jaho kniharni.

• 0
• 0
• 3
• 0
• 2
• 1
• 0
• 0