«Hrodna Azot» pastaŭlaŭ svaje ŭhnajeńni va Ukrainu jak nibyta turkmienskija

Jak vynikaje z sudovaha rašeńnia Šaŭčenkaŭskaha rajonnaha suda Kijeva, jakoje maje ŭ svaim rasparadžeńni «Radyjo Svaboda», śledčyja raskryli hetuju schiemu padčas rasśledavańnia kryminalnaj spravy suprać ukrainskaj kampanii «Oskar Optima», jakaja zajmałasia pastaŭkami i realizacyjaj va Ukrainie biełaruskich minieralnych uhnajeńniaŭ.

Jak adznačajecca ŭ dakumiencie, «Hrodna Azot» čyhunkaj adpraŭlaŭ svaju pradukcyju ŭ port rasijskaha horada Rastova-na-Donie, adkul jaje pierapraŭlali ŭ port horada Burhasa (Bałharyja). Tam uhnajeńni rasfasoŭvali ŭ miaški, a potym pieravozili ŭ port horada Ruse na race Dunaj, taksama ŭ Bałharyi. A ŭžo adtul na karablach hrodzienskija ŭhnajeńni pieravozili ŭ Izmailski marski port, dzie mytnaje afarmleńnie pravodzili na padstavie siertyfikataŭ ab pachodžańni pradukcyi z Turkmienistana, pradpryjemstvy jakoha ŭvohule nie vyrablajuć taki vid uhnajeńniaŭ.

Z dapamohaj servisu ImportGenius, jaki pakazvaje hłabalnyja handlovyja dakumienty ab imparcie/eksparcie ad Mytnaj słužby ZŠA, žurnalisty «Radyjo Svaboda» znajšli adnu z takich pastavak, zroblenych u krasaviku 2023 hoda.

Dubajskaja kampanija Agro chain general trading LLC pastaŭlała minieralnyja ŭhnajeńni, byccam by z Turkmienistana, va Ukrainu na sumu 1,1 miljona dalaraŭ. Imparcioram paznačanaja ŭkrainskaja kampanija «Oskar Optima».

U toj ža čas košt hetaha kantrakta nie supadaje ź finansavymi vynikami ŭkrainskaj kampanii-atrymalnika, jakija jana pieradała kantrolnym orhanam.

Ukrainskija śledčyja vyśvietlili nazvy ŭsich suchahruzaŭ, na jakich biełaruskija ŭhnajeńni pieravozili z Bałharyi — White Star, Marina, Dobrich, Danimex 3, Leda, Paul P.

Usiaho takim čynam va Ukrainu viasnoj 2023 hoda zavieźli 4900 ton pradukcyi. Uhnajeńni ź pieršych čatyroch sudnaŭ paśpieli pieravieźci ŭ horad Dniapro i častku navat realizavać.

Jašče 4506 ton minieralnych uhnajeńniaŭ u vadkim vyhladzie ŭ siaredzinie krasavika 2023 hoda ŭ Izmailski port dastavili try baržy — «627», «490», «DDS-1». Ich zahruzili biełaruskaj pradukcyjaj u porcie Kanstanca (Rumynija), adkul vieźli va Ukrainu.

U chodzie rasśledavańnia vyjavili, što siertyfikaty pachodžańnia pradukcyi byli padroblenyja. U telefonie adnaho z pradstaŭnikoŭ ukrainskaj kampanii znajšli pierapisku z hramadzianami Turcyi, jakija źjaŭlajucca kiraŭnikami dubajskaj kampanii Agro Chain general trading LLC. Dziakujučy hetaj pierapiscy ŭdałosia paćvierdzić, što pieršyja partyi minieralnych uhnajeńniaŭ pastaŭlalisia z Rastova, a faktyčnym adpraŭnikom i vytvorcam hranulavanaha karbamidu źjaŭlajecca AAT «Hrodna Azot».

Paźniej u Instytucie sudovych ekśpiertyz Ukrainy paćvierdzili, što ŭhnajeńni, jakija pastaŭlała ŭkrainskaja kampanija «Oskar Optima», całkam adpaviadajuć uzoram pradukcyi, vyrablenaj u Hrodnie.

• 0
• 0
• 1
• 2
• 0
• 0
• 1
• 0