Znojdzieny samy ŭdačlivy rybak Biełarusi: za hadzinu jon vyłaviŭ u Minsku dźvie 18-kiłahramovyja rybiny
Valeryj Małachaŭ udała parybačyŭ na Čyžoŭskim vadaschoviščy.
Žychar Minska Valeryj Małachaŭ za hadzinu na Čyžoŭskim vadaschoviščy vyłaviŭ 18-kiłahramovaha sazana i prykładna takoha ž pa vazie i pamierach taŭstałobika.
Valeryj pačaŭ uzmocniena rybačyć 5 hadoŭ tamu. U asnoŭnym jon paluje na drapiežnuju rybu. Razam z naparnikam mužčyna vyrašyŭ źjeździć na Čyžoŭskaje vadaschovišča. Metaj byŭ sudak, ale trapiłasia zusim inšaja ryba, piša Onliner.
«Spuścilisia na vadu. Hadzin ź dziesiaci płavali, i niedzie kala dvuch klunuŭ sazan. Nu jak klunuŭ — zabahryŭsia. Ja na śpininh łaŭlu, sazan začapiŭsia nižniaj častkaj skivicy. Pierš za ŭsio padumaŭ, što heta som. Doŭha jon kataŭ nas na łodcy — chvilin 25, ale ja ŭsio roŭna hetuju rybinu dastaŭ.
Emocyi byli takija, što nie pieradać słovami! Vaha ryby skłała 18,4 kh. Takoha vializnaha sazana ja złaviŭ upieršyniu ŭ žyćci. Da hetaha moj rekord byŭ 7-9 kh», — raspavioŭ Vital.
Ale heta było tolki pačatak. Na praciahu hadziny jon vyciahnuŭ z vadaschovišča 18-kiłahramovaha taŭstałobika.
«Taŭstałobika ja ŭpieršyniu złaviŭ. Raniej hetuju rybu ŭvohule nie bačyŭ. Taki ŭłoŭ — vypadkovaść i krychu šancavańnia. Hałoŭnaje — atrymaŭ zadavalnieńnie, adrenalin. Rybu patrymaŭ, sfatahrafavaŭsia i adpuściŭ. Mnie bolšaha nie treba», — adznačyŭ rybak.
Vital dadaŭ, što ŭ miežach horada vodziacca jašče bujniejšyja rybiny.
«U majoj łodcy ŭstalavany rechałot. I jon pakazvaŭ siłuety takich ryb, što navat strašna było zakinuć u ich bok snaść. A hetaj viasnoj viadomy rybak Jaŭhien Atrachimavič złaviŭ u Čyžoŭcy taŭstałobika na 35 kh. Tak što monstry tam płavajuć dobryja, i złavić bujnuju rybu całkam realna», — ličyć Vital.
Kamientary