Nie mienš za 20 čałaviek zahinuli, i bolš za 60 atrymali ranieńni ŭ vyniku izrailskaha avijaŭdaru pa stalicy Livana. Žyły vaśmipaviarchovy dom u centry Biejruta byŭ całkam źniščany, jašče piać susiednich budynkaŭ atrymali paškodžańni, piša Bi-bi-si.
Izrail praciahvaje nastup na «Chiezbału». Metaj udaraŭ, mahčyma, staŭ kiraŭnik słužby źniešniaj biaśpieki hrupoŭki. Pavodle infarmacyi Nacyjanalnaha ahienctva navin Livana, pa centralnym rajonie Basta ŭ Biejrucie było vypuščana nie mienš za piać rakiet.
Vykarystanaja zbroja była raźličana ŭ tym liku na źniščeńnie bunkieraŭ, i na miescy ŭdaru zastaŭsia hłyboki krater.
«Udar byŭ nastolki mocnym, što zdavałasia, što budynak voś-voś upadzie nam na hałovy», — raskazaŭ ahienctvu AFP 60-hadovy Samir, jaki žyvie ŭ budynku nasuprać razburanaha.
Udar adbyŭsia kala čatyroch hadzin ranicy pa miascovym časie.
Pavodle słoŭ Samira, jon vybieh z domu razam z žonkaj i dvuma dziećmi: «My ŭbačyli dvuch miortvych ludziej, jakija lažali na ziamli… Dzieci pačali płakać, a ich maci płakała jašče bolš».
Ab atacy izrailskija vajskovyja ŭłady zahadzia nie papiaredžvali i nie zaklikali žycharoŭ evakujavacca. Raniej takija ŭdary, jakija Izrail nanosiŭ biez papiaredžańnia za miežami rajonaŭ, dzie znachodziacca bajeviki «Chiezbały», byli naceleny na vysokapastaŭlenych členaŭ hrupoŭki.
Ci zahinuŭ chtości ź ich u hety raz, pakul nie viadoma. Izrailskija aficyjnyja asoby pakul nie kamientavali zdareńnie.
Ratavalnyja słužby praciahvajuć rasčyščać zavały na miescy ŭdaru, tamu nie vyklučana, što kolkaść zahinułych budzie raści. Livanskaje Ministerstva achovy zdaroŭja zajaviła, što dla identyfikacyi achviar buduć vykarystoŭvacca testy DNK.
Načny ŭdar staŭ užo čaćviortaj pa liku atakaju Izraila na centr Biejruta za hety tydzień. Paśla hetaha rakietnaha ŭdaru izrailskija siły praciahnuli nanosić udary pa paŭdniovych vakolicach Biejruta, jakija ličacca apłotam «Chiezbały». U hetym vypadku Armija abarony Izraila (CACHAŁ) addała zahad ab evakuacyi žycharoŭ paŭdniovaha Biejruta, jakija, pavodle śćviardžeńnia izrailskaha boku, znachodzilisia «pobač z abjektami «Chiezbały».
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary