Pamior były mitrapalit Litvy Chryzastom — adziny archijerej RPC, jaki publična pryznaŭ fakt supracy z KDB
Jon, uradženiec Padmaskoŭja, pakinuŭ paśla siabie dobruju pamiać u Litvie — bo padtrymaŭ ruch za niezaležnaść krainy.
U noč na 6 studzienia 2025 hoda na 91-m hodzie žyćcia pamior mitrapalit Chryzastom (Hieorhij Marciškin), jaki ŭznačalvaŭ Litoŭskuju pravasłaŭnuju carkvu z 1990 da 2010 hoda.
Jon byŭ najstarejšym z archijerejaŭ Ruskaj pravasłaŭnaj carkvy. I adzinym, chto publična pryznaŭsia ŭ supracoŭnictvie z KDB.
U 1972—1990 hadach jon byŭ infarmataram pad psieŭdanimam «Restaŭratar», kali słužyŭ archijepiskapam u Kursku, a paśla Irkucku. Chryzastom tłumačyŭ hetaje svajo rašeńnie nieabchodnaściu abarony intaresaŭ carkvy: «Kali ja niešta i rabiŭ, pracujučy ź imi, to vyklučna ŭ stratehičnych metach, ratujučy carkvu».
«Ja ŭvachodziŭ u kantakt z KDB, ale nie byŭ stukačom. Naprykład, ja atrymlivaŭ zhodu KDB na pryznačeńnie na prychod śviataroŭ», — raskazvaŭ jon i zapeŭnivaŭ, što nie prynosiŭ škody viernikam.
Chryzastom spyniŭ suviazi z KDB u pačatku 1990 hoda paśla pieravodu ŭ Vilniu, dzie jon staŭ mitrapalitam Vilenskim i Litoŭskim.
U Litvie jon zapomniŭsia jak udzielnik ruchu za niezaležnaść krainy. Byŭ siabram rady siejma «Sajudzisa», asudziŭ dziejnaść savieckich uładaŭ padčas rasstrełu litoŭcaŭ 13 studzienia 1991 hoda. Jaho abvinavačvali ŭ zdradzie rasijskim intaresam i pralitoŭskaj pazicyi, adnak mitrapalit nastojvaŭ, što jon prosta salidarny z narodam, jaki chacieŭ niezaležnaści.
Chryzastom pakinuŭ pasadu mitrapalita Vilenskaha i Litoŭskaha ŭ 2010 hodzie pa stanie zdaroŭja.
Kamientary