ŠI Claude pierahaniaje ChatGPT pa papularnaści ŭ prahramistaŭ i biznesu
Amierykanski startap Anthropic byŭ zasnavany ŭ 2021 hodzie byłymi supracoŭnikami OpenAI. Zaraz jaho košt moža dasiahnuć 60 miljardaŭ dalaraŭ.
Jak paviedamlaje The Wall Stree Journal, Anthropic viadzie pieramovy ab pryciahnieńni $2 miljardaŭ inviestycyj, što moža pavysić jaho vartaść da $60 miljardaŭ, paviedamlaje WSJ. Heta bolš čym utraja pieravyšaje letašniuju acenku ŭ $18 miljardaŭ.
Hałoŭny pradukt kampanii — čat-bot Claude. Jon papularny siarod prahramistaŭ i biznesu, ale pakul sastupaje ChatGPT u vykarystańni zvyčajnymi karystalnikami. Hadavy prybytak kampanii ŭžo dasiahnuŭ $875 miljonaŭ.
Admietnaść Anthropic — surjoznaja zakłapočanaść biaśpiekaj vykarystańnia štučnaha intelektu. Kampanija nie tolki padtrymlivaje strohija standarty testavańnia, ale i supracoŭničaje ź dziaržaŭnymi ŭstanovami ZŠA.
Jak pisała «Naša Niva» raniej, Anthropic supracoŭničaje ź Ministerstvam enierhietyki ZŠA i Administracyjaj pa nacyjanalnaj jadziernaj biaśpiecy (NNSA), kab pravieryć, ci mohuć jaje madeli ŠI być vykarystany dla stvareńnia jadziernaj zbroi.
Kampanija karystajecca padtrymkaj bujnych partnioraŭ, — piša dalej WSJ.
Naprykład, Amazon ukłaŭ u Anthropic $8 miljardaŭ z 2023 hoda i zabiaśpiečvaje jaje data-centrami. Inšy technałahičny hihant, Google, taksama ŭkładvaje miljardy ŭ raźvićcio kampanii.
U ciapierašni čas Anthropic znachodzicca ŭ šerahu viadučych ŠI-startapaŭ śvietu, sastupajučy tolki SpaceX, OpenAI, Stripe i Databricks. Jaho raźvićcio adbyvajecca na fonie hłabalnaha rostu cikavaści da štučnaha intelektu, jaki zdolny kardynalna źmianić sposab pracy i žyćcia ludziej. Takija kampanii, jak OpenAI, xAI Iłana Maska i Perplexity, taksama aktyŭna pryciahvajuć finansavańnie i raściahvajuć miežy mahčymaha.
Ciapier Anthropic stanovicca klučavym hulcom u honcy za stvareńnie biaśpiečnych i nadziejnych technałohij ŠI. A inviestary, jak vidać, zastajucca aptymistami nakont jaho pierśpiektyŭ, niahledziačy na vysokija vydatki i kankurencyju.
Kamientary