Zialenski: Rasija sioleta budzie sprabavać niepasredna ŭciahnuć Biełaruś u vajnu
Prezident Ukrainy Uładzimir Zialenski zajaviŭ, što Rasija nie imkniecca skončyć vajnu, a jakraz naadvarot — viasnoj, letam ci vosieńniu 2025 hoda budzie sprabavać uciahnuć u jaje Biełaruś. Pra heta jon skazaŭ 5 lutaha padčas razmovy z žurnalistami.
Zialenski papiaredziŭ, što Rasija pačnie raźmiaščać svaje siły ŭ Biełarusi, dadaŭšy, što «heta nie prosta niejkaja čarhovaja rytoryka».
«Z ambicyjami Pucina, i toje, što siońnia my bačym — jon robić usio, kab nie spynić hetuju vajnu. I heta fakt. Jon budzie iści dalej u hetym. I budzie dumać pra inšyja krainy. Ja ŭ hetym upeŭnieny. Ja papiaredžvaju pra heta, całkam adkryta, — ja razumieju, što budzie.
Vy ŭbačycie — jon budzie pravakavać inšyja krainy. Moža być Polšča nastupnaj abo bałtyjskija krainy. I heta nie prosta niejkaja čarhovaja rytoryka. Vy ŭbačycie: viasnoj, letam ci vosieńniu jon budzie raźmiaščać siły na terytoryi Biełarusi», — pierakanany Zialenski.
Ukrainski prezident pryznaŭ, što hetyja słovy mohuć uspryniać jak zapałochvańnie, adnak jon pierakanany, što tak i budzie.
«Ale vy ŭbačycie — jon budzie rabić usio, kab uciahnuć ich. Jon budzie dumać, jak ich pravakavać. Ja nie viedaju, ci budzie ŭvarvańnie, ale, u lubym vypadku, jon takim čynam zaciahnie Biełaruś u vajnu», — skazaŭ Zialenski.
Pry hetym jon udakładniŭ:
«Choć, na maju dumku, paśla taho, jak jany atakavali Ukrainu rakietami — jany ŭžo byli ŭ hetaj vajnie, ale ich ludziej i ich vojska niama, pakul, ale Pucin hetaha vielmi choča».
Kamientary