Zialenski: Kali nie bieracie nas u NATA, to dajcie jadziernuju zbroju
Zachodnija partniory pavinny dać Ukrainie jadziernuju zbroju ŭ vypadku admovy pryniać jaje ŭ NATA, zajaviŭ prezident Ukrainy Uładzimir Zialenski ŭ intervju brytanskamu viadučamu Pirsu Morhanu. Na jahonuju dumku, heta budzie dastatkovaj harantyjaj biaśpieki i dazvolić utrymać prezidenta Rasii Uładzimira Pucina ad novaha napadu.
Zialenski adznačyŭ, što ŭstupleńnie Ukrainy ŭ NATA moža zaciahnucca «na hady abo dziesiacihodździ», u suviazi z čym uźnikaje pytańnie, što budzie abaraniać jaje «ad hetaha zła ŭvieś hety čas».
«Jaki pakiet padtrymki, jakija rakiety? Ci daduć nam jadziernuju zbroju? Tady chaj jany daduć nam jadziernuju zbroju», — zajaviŭ jon.
Pa słovach Zialenskaha, zvyčajnyja rakiety nie zmohuć spynić jadziernyja, tamu zastajecca tolki taki varyjant. Taksama jon adznačyŭ, što partniory mohuć dapamahčy Ukrainie ź finansavańniem «miljonnaj armii» i raźmiaščeńniem svaich vojskaŭ u krainie.
«Pierakińcie svoj kantynhient u tyja častki našaj dziaržavy, dzie my chočam stabilnaści situacyi, kab ludzi byli spakojnyja», — zaklikaŭ Zialenski zachodnija krainy.
Jon dadaŭ, što kali Ukraina nie ŭvojdzie ŭ NATA, to Pucin, jaki vykarystaŭ hety arhumient, apraŭdvajučy ŭvarvańnie, «pavinien całkam adstupić».
«Jon uvarvaŭsia, bo bajaŭsia, što my staniem členami NATA. Dobra, my nie členy NATA. Viartajcie našy ziemli. Heta pavinna razhladacca mienavita tak», — padkreśliŭ Zialenski.
Akramia taho, jon adznačyŭ u intervju, što
«kali sustreča z Pucinym dla dasiahnieńnia mirnaha pahadnieńnia — heta budzie adziny varyjant, to my, biezumoŭna, pojdziem na takuju sustreču».
Pa słovach Zialenskaha, ciapier Ukraina nie moža viarnuć usie terytoryi i «nie moža hublać miljony ludziej dziela vyniku, jaki moža i nie nastupić». Jon adznačyŭ, što kraina nie moža «parušyć prysiahu, jakuju davali tym, chto addaŭ svajo žyćcio dziela krainy ŭ hetaj vajnie». Taksama nielha parušać ukrainskuju Kanstytucyju i pryznavać akupavanyja terytoryi rasijskimi.
«My vierym, što prezident Tramp choča damahčysia pośpiechu ŭ hetaj situacyi, a pośpiech — heta pieramoha zdarovaha sensu, i heta, biezumoŭna, kaniec haračaj fazy vajny. Heta, niesumnienna, mocnyja harantyi biaśpieki dla Ukrainy, prynamsi dla taho, kab Pucin nie viarnuŭsia z vajnoj znoŭ praz paŭhoda, miesiac, dva ci hod».
Pry hetym prezident Ukrainy adznačyŭ, što jahonaja kraina atrymała ŭ vyhladzie zbroi tolki 46 miljardaŭ dalaraŭ z abiacanych 77 miljardaŭ, a peŭnaja častka srodkaŭ zastałasia ŭ ZŠA dla vytvorčaści ŭzbrajeńnia.
Zialenski: Ukraina jak nikoli blizkaja da miru
Tramp prapanavaŭ dapamohu Ukrainie ŭ abmien na redkaziamielnyja mietały. Kijeŭ adkazaŭ
«Kroŭ vajny». Čym važnyja ataki Ukrainy na rasijskija NPZ i ci jość ad hetaha efiekt
Łukašenka prakamientavaŭ słovy Zialenskaha pra prapanovu ŭdaryć pa NPZ
Zialenski patłumačyŭ, čamu ŭ svoj čas zabaraniŭ pieramaŭlacca z Pucinym
Tramp: Zialenski nie anioł. Jon nie pavinien byŭ dapuścić hetaj vajny
Ciapier čytajuć
Biełaruskim top-čynoŭnikam u Vałhahradzie razdali kałaradskija stužki. Marzaluk zastaŭsia ź jabłynievaj FOTY8
Kamientary