Čytačy vydańnia «Anłajnier», jakija žyvuć u Smalavičach, skardziacca na prablemy z transpartnym złučeńniem: raskazvajuć pra praciahłaje čakańnie maršrutak u Minsk i nazad i doŭhija čerhi z achvotnych na ich jechać.
«Prablemy pačalisia ŭ paniadziełak. Maršrutki na Minsk, jakija raniej chadzili ranicaj ź intervałam u 5 chvilin, stali jeździć niezrazumieła jak. Ludzi vymušanyja byli padoŭhu čakać transpart, kab uleźci ŭ maršrutku choć by stojačy.
Mnohija spaźnilisia na pracu. U aŭtorak — taja ž historyja, — padzialiłasia žycharka Smalavičaŭ Julija. — Hulaje infarmacyja, što pieravozčyku «Jeŭraviza» nie praciahnuli licenziju i ŭsia prablema ŭźnikła praz heta».
«Ludzi ź Minska nie mohuć trapić u Smalavičy. Niečakana źnikli maršrutki», — dadaje jašče adzin čytač «Anłajniera», skardziačysia na čerhi z pasažyraŭ.
«Minabłpasažyrtrans» na zapyt redakcyi vydańnia adkazaŭ:
«Da niadaŭniaha času ŭ nas pracavali try aŭtobusy «Minabłaŭtatransa» (№447) i maršrutki pieravozčyka «Jeŭraviza» (№2470). Apošnich praduhledžvałasia 15 adzinak. Adnak u zhadanaha pieravozčyka ŭźnikli prablemy z vykanańniem abaviazacielstvaŭ:
jany źviarnulisia da nas, patłumačyŭšy, što nie mohuć vykonvać maršruty ŭ tym ža abjomie. U niejki momant jany i zusim pierastali vypuskać patrebnuju kolkaść maršrutak u rejs, za što my ich «karali», — kamientuje situacyju Siarhiej Jacynovič, namieśnik dyrektara «Minabłpasažyrtransa».
— Našy śpiecyjalisty ŭžo vyvučyli pasažyrapatok na roznych punktach (prypynkach), kab z zaŭtrašniaha dnia zapuścić dadatkovy vialiki aŭtobus ad abłtransa. Sa Smalavičaŭ jon budzie vyjazdžać u 06:45, 08:40, 15:35 i 17:25. Sa staličnaha «Uschodu — u 07:45, 09:40, 16:35, 18:25.
Taksama ciapier my zajmajemsia tym, što vielmi apieratyŭna pierabivajem raskład.
Ad abłtransa buduć pracavać siem (zamiest troch) aŭtobusaŭ katehoryi M3, zdolnych źmiaścić značna bolšuju kolkaść pasažyraŭ. Jany buduć iści ranicaj, prykładna ŭ adnym kalidory. Heta značyć, u samy pikavy čas jany prosta pojduć adzin za adnym, zabiaśpiečyŭšy vyvaz pasažyraŭ sa Smalavičaŭ u Minsk».
Pradstaŭnik «Minabłpasažyrtransa» dadaje, što maršrutki ad pryvatnikaŭ taksama praciahnuć kursiravać. Ale jakaja kankretnaja kolkaść ich budzie — pakul u arhanizacyi skazać nie mohuć.
Kamientary