Cichanoŭskaja pryznałasia, što mała čym moža pamahčy biełarusam u Hruzii
Hruzinskija ŭłady abiacali nie departavać biełaruskich hramadzian nazad u Biełaruś, paviedamiła Śviatłana Cichanoŭskaja padčas słuchańniaŭ u Varšavie 7 lutaha ŭ Kaardynacyjnaj radzie. Ale heta badaj i ŭsio, čaho na hetym kirunku biełaruskim demakratyčnym siłam udałosia dabicca, piša «Pozirk».
Delehatka Kaardynacyjnaj rady Maryna Zialonaja, jakaja žyvie ŭ Hruzii, adznačyła, što za apošni čas było padadziena jak minimum 86 zajaŭ na atrymańnie mižnarodnaj abarony, ale nivodnaja ź ich nie atrymała stanoŭčaha adkazu. Niekatoryja spravy ŭžo razhladajucca ŭ sudach pa pravach čałavieka. Zialonaja cikaviłasia, što robicca Ofisam Cichanoŭskaj i Abjadnanym pierachodnym kabinietam dla biełarusaŭ u Hruzii, asabliva tych, u kaho skončyŭsia termin dziejańnia pašparta.
Cichanoŭskaja adkazała, što raniej, kali ŭłady ŭ Hruzii byli inšymi, adnosiny składvalisia dobra, abmiarkoŭvalisia pytańni dapamohi biełarusam i naładžvałasia supracoŭnictva. Ź ciapierašnim uradam adnosiny «praktyčna adsutničajuć»: zapyty i prośby nie razhladajucca, mižnarodnych sustreč nie adbyvajecca. Pa słovach demakratyčnaj lidarki, situacyja dla biełarusaŭ u Hruzii składanaja, i kraina stała «bolem biełaruskich demakratyčnych sił na mižnarodnaj arenie».
Adzinaje, što ŭdałosia atrymać ad ciapierašniaha hruzinskaha ŭrada, — heta ŭskosnaje abiacańnie, što biełarusaŭ nie buduć departavać nazad u Biełaruś. Adnak miechanizmaŭ dla abnaŭleńnia praterminavanaha biełaruskaha pašparta ŭ Hruzii niama, taksama ŭłady nie dajuć prytułku biełaruskim hramadzianam. U ekstrannych situacyjach možna, adnak, sprabavać evakujavać ludziej dziakujučy dapamozie pravaabaroncaŭ i fondaŭ salidarnaści.
Cichanoŭskaja rekamienduje tym, u kaho jašče dziejničaje pašpart, razhledzieć mahčymaść pierajezdu ŭ inšyja krainy, choć by navat u Armieniju, dzie situacyja z kamunikacyjaj z uradam ciapier lepšaja.
Hruzija dziakujučy bieźvizavamu režymu i spryjalnym umovam znachodžańnia była adnoj z asnoŭnych krain, kudy paśla represij u Biełarusi emihravali ludzi, jakija ŭdzielničali ŭ masavych akcyjach pratestu paśla prezidenckich vybaraŭ 2020 hoda. Ciapier biełarusy mohuć znachodzicca ŭ Hruzii na praciahu hoda bieź pierapynku, paśla čaho, kab «abnulać» termin znachodžańnia, nieabchodna pakinuć krainu na luby pieryjad. Viarnucca nazad, adnak, mohuć nie ŭsie, i pierš za ŭsio ŭ zonie ryzyki tyja, chto prajaŭlaje publičnuju palityčnuju aktyŭnaść.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj30
Kamientary