Stała viadoma novaje miesca pracy kaśmičnaj turystki Maryny Vasileŭskaj

Aficyjnaja bijahrafija z prabiełami

Ciapier Vasileŭskaj 34 hady. 23 sakavika 2024 hoda jana adpraviłasia ŭ kosmas paśla 8-miesiačnaj padrychtoŭki i praviała na MKS 12 sutak.

Dziaržprapahanda nazvała žančynu «pieršym kasmanaŭtam suvierennaj Biełarusi». Alaksandr Łukašenka daŭ joj zvańnie Hieroja Biełarusi, u Minsku paabiacali pastavić skulpturu, pryśviečanuju jaje palotu.

Adnak usio akazałasia nie zusim tak bravurna, jak padała prapahanda. «Lusterka» vyśvietliła, što «Raskosmas» paznačyŭ jaje jak kaśmičnuju turystku — nazyvać žančynu prafiesijnaj kasmanaŭtkaj nielha (asabliva z ulikam taho, što jana rychtavałasia da palotu mienš za hod).

Biełaruskija dziaržSMI šmat pisali pra Vasileŭskuju, nie škadujučy epitetaŭ. Publična paviedamlałasia, što Maryna skončyła minskuju škołu № 151 u 2008 hodzie, a z 2017-ha ŭładkavałasia ŭ avijakampaniju «Biełavija», dzie pracavała instruktaram-bortpravadnikom kala siami hadoŭ.

Pry hetym u jaje bijahrafii zastavalisia prabieły — naprykład, pra vyšejšuju adukacyju nie zhadvałasia ni ŭ adnym z mnostva intervju. «Lusterka» adšukała infarmacyju pra toje, što Vasileŭskaja atrymlivała vyšejšuju adukacyju pa śpiecyjalnaści «mieniedžar-ekanamist» zavočna ŭ pryvatnaj VNU Minski inavacyjny ŭniviersitet (ciapier ustanova zakrytaja). U 2024 hodzie sama kasmaturystka paviedamiła, što pastupiła ŭ mahistraturu Akademii kiravańnia.

Hramadskaja arhanizacyja i jaje kamiercyjny «spadarožnik»

Pry dapamozie «Kibierpartyzan» žurnalisty atrymali danyja aficyjnych rejestraŭ, u jakich paznačanyja pracoŭnyja miescy Maryny Vasileŭskaj, pra jakija nie było viadoma raniej.

Dva samyja śviežyja zapisy — hramadskaje abjadnańnie «Biełaruski fond miru» i TAA «EkaPramPanel». Da abiedźviuch arhanizacyj Vasileŭskaja dałučyłasia ŭ žniŭni 2024 hoda.

Pra dziejnaść u fondzie miru jana šmat raskazvaje na svajoj staroncy ŭ instahramie, źjaŭlajecca na jaho mierapryjemstvach. Jak vynikaje z apisańnia profilu Vasileŭskaj, jana kuryruje prajekt «Škoła miru», meta jakoha — «sadziejničańnie vychavańniu dziaciej i moładzi na pryncypach miru, družby, uzajemarazumieńnia». Aficyjna jaje pasada nazyvajecca tak: namieśnicy staršyni praŭleńnia pa humanitarnym supracoŭnictvie i hramadskaj dziejnaści Biełaruskaha fondu miru.

A voś pra pracu ŭ kamiercyjnaj arhanizacyi Vasileŭskaja paličyła za lepšaje nie paviedamlać publična.

«EkaPramPanel» — biełaruskaja kampanija, jakaja zajmajecca vytvorčaściu dachavych i ścienavych sendvič-panelaŭ. Jaje asnoŭnyja ŭłaśniki — pradprymalniki Dźmitryj Padabied i Siarhiej Zankievič, taksama źviazanyja z kampanijaj «Izamat-Bud».

Cikava, što ŭ «EkaPramPaneli» i «Biełaruskim fondzie miru» adnolkava zavuć kiraŭnika — Maksim Uładzimiravič Miśko. Pry hetym dyrektar kamiercyjnaj arhanizacyi nie paznačany na sajcie kampanii ŭ raździele «Kamanda», dzie źmieščanyja partrety inšych supracoŭnikaŭ i kiraŭnikoŭ. Adnak jaho poŭnaje imia značycca ŭ raździele «Rekvizity».

Na hetym suviazi kamiercyjnaj kampanii i hramadskaj arhanizacyi nie zakančvajucca. Naprykład, adzin z saŭładalnikaŭ «EkaPramPaneli» Dźmitryj Padabied prysutničaŭ na sustrečy «Fondu miru» z kalektyvam Ašmianskaj centralnaj rajonnaj balnicy ŭ kastryčniku 2024 hoda. Biznesmiena na hetym mierapryjemstvie pradstavili jak «aktyvista» hramadskaj arhanizacyi. Na hetuju ž sustreču pryjechała i Maryna Vasileŭskaja, jakaja raskazała, što «mir — heta samaje kaštoŭnaje» i jak važna ŭsio zachavać i pamnožyć. 

Pavialičyć

Kaśmičnaja staronka

Z 19 lipienia 2023 hoda da 26 krasavika 2024 hoda Maryna Vasileŭskaja była pracaŭładkavanaja ŭ Nacyjanalnaj akademii navuk Biełarusi. Hety pieryjad supaŭ z «kaśmičnaj» častkaj jaje bijahrafii. Praź niekalki dzion paśla pracaŭładkavańnia ŭ akademii było aficyjna abvieščana: biełaruska pačała rychtavacca da palotu ŭ kosmas. 6 krasavika 2024 hoda Vasileŭskaja viarnułasia z arbity na ziamlu i ŭ hetym ža miesiacy zaviaršyła supracoŭnictva z navukovaj strukturaj.

Jakuju pasadu Vasileŭskaja aficyjna zajmała ŭ Akademii navuk — z dastupnych danych niezrazumieła. Žančynu rychtavali da palotu va ŭpraŭleńni aerakaśmičnaj dziejnaści arhanizacyi, a na borcie jana vykonvała navukovyja ekśpierymienty (z sumnieŭnaj navukovaj kaštoŭnaściu).

Bortpravadnik z «padpracoŭkaj»

Da pačatku padrychtoŭki da palotu Vasileŭskaja była aformlenaja ŭ troch arhanizacyjach adrazu:

• Avijakampanija «Biełavija» (z 2017 pa 2023 hod);
• TAA «Biełamarkiet Chielena Valery» (z 2019 pa 2023 hod);
• TAA «Chielena Valery» (z 2022 pa 2023 hod).

Z «Biełavija» ŭsio zrazumieła — Vasileŭskaja pracavała tam bortpravadnicaj-instruktaram i šmat razoŭ pra heta raskazvała.

A «Chielena Valery» i «Biełamarkiet Chielena Valery» — heta kampanii, jakija zajmajucca prodažam tavaraŭ Duty Free u kramach na miežach Biełarusi i ŭ aeraporcie.

Adna z kampanij — «Biełamarkiet Chielena Valery» — naležyć na 49,99% TAA «Dypmarkiet» (dziaržaŭnaja firma, uvachodzić u Kiraŭnictva spravami Łukašenki), a na 50,01% — TAA «Chielena Valery». U svaju čarhu, kampanija «Chielena Valery» naležyć dźvium biznesvumien — Alenie Skrypiel (na 80%) i Rycie Brycikavaj (na 20%). Skrypiel i Brycikava taksama zajmajuć pasady kiraŭnikoŭ dźviuch hetych jurydyčnych asob.

U adnym ź intervju Alena Skrypiel raskazvała, što paznajomiłasia z Łukašenkam u 1996 hodzie. Paśla ŭ peŭny momant kramy stracili prava handlavać biez pošlin, adnak «čakali čas, pierakanali prezidenta ŭ nieabchodnaści adkryć kramy djuci-fry». Taksama Skrypiel kiruje Biełaruskaj asacyjacyjaj himnastyki ź listapada 2014 hoda.

Pavialičyć

Jakuju pasadu zajmała Maryna Vasileŭskaja ŭ hetych strukturach — z dastupnych danych niezrazumieła. Vierahodna, jaje adnačasovaje pracaŭładkavańnie ŭ «Biełavija» i Duty free źviazana z prodažam tavaraŭ biaspošlinnaha handlu na borcie samalotaŭ. Rabić heta dazvolena ŭkazam Łukašenki, vydadzienym u 2019 hodzie.

Rannija hady

U bolš rańnich danych — epizadyčnyja zapisy pra niekalki miescaŭ pracy — za pieryjad z 2009 pa 2011 hod (Vasileŭskaj u hety čas było ad 19-20 hadoŭ). U ich liku — restaran, kampanija — pradaviec praduktaŭ charčavańnia i minskaje adździaleńnie Biełaruskaj čyhunki.

Z 2013 pa 2014 hod Maryna Vasileŭskaja značyłasia zasnavalnicaj jurydyčnaj asoby «Maryjana iviest» (asnoŭny vid dziejnaści — roźničny handal kaŭbasnymi vyrabami i viandlinaj). Adnak u 2015 hodzie kampanija była likvidavanaja.

• 0
• 2
• 15
• 8
• 2
• 1
• 0
• 0